Rossiyada internet tarmog‘ida katta uzilish kuzatildi

14 yanvar, seshanba kuni Rossiyada internet tarmog‘ida katta uzilish yuz berdi. Rossiyaning barcha yirik mobil va statsionar internet operatorlari, xususan, «Bilayn», «Megafon», Ms, «Rostelekom» va Tele 2 da trafik muammolari kuzatildi. Mamlakatning turli mintaqalaridagi foydalanuvchilar brauzerlar, videoxosting xizmatlari, qidiruv tizimlari, bank servislari va messenjerlarni ochishda muammolarga duch keldi. Boshqa narsalar qatorida Telegram, TikTok, Google, YouTube, Steam va Twitch ochilmadi. Shu bilan birga, ru/rf domeniga ega saytlar uzluksiz yuklanmoqda, deya xabar beradi Rossiya domenlarini muvofiqlashtirish markazi. Telegram va "Vkontakte" ijtimoiy tarmoqlari ham ishlashda davom etdi, deb yozadi E1 nashri.

Roskomnadzor uzilishga aloqador emasligini bildirdi

Roskomnadzor (RKN) keng ko‘lamli nosozlikni tasdiqladi va RKNning bunga aloqasi yo‘qligini ta’kidladi. «Barcha operatorlar bo‘yicha nosozliklar qayd etilmoqda, nosozlik sabablari aniqlanmoqda», — deyiladi idora matbuot xizmati xabarida.

Taxminan yarim soat o‘tgach, servislar ishi tiklana boshladi va bir soatdan keyin Roskomnadzor Tarmoq qayta tiklanganini e’lon qildi. «Ulanishda qisqa muddatli uzilish aniqlandi. Kommunikatsiyalar tarmog‘ini monitoring qilish va boshqarish markazi navbatchilik xizmatlari tomonidan tarmoqning ishlashi zudlik bilan tiklandi», — deyiladi xabarda.

Yil boshidan beri ikkinchi nosozlik

Yekaterinburgdagi NetAngels xostingi direktori Anton Xoliqovning fikricha, nosozlik «TQTV (tahdidlarga qarshi turishning texnik vositalari)ga yangilanishning noto‘g‘ri yuklab olinishi» bilan bog‘liq bo‘lishi mumkin. «Yangilanish barcha provayderlarga yetib kelmagan yoki u barcha provayderlarga yetib borguncha to‘xtatilgan bo‘lishi mumkin», — deya uning so‘zlarini keltiradi E1. Bu fikrni sohaning boshqa bir qator mutaxassislari ham qo‘llab-quvvatlamoqda.

Bu Rossiyada 2025 yil boshidan beri internet ishida ikkinchi yirik uzilishdir. Bunday uzilish bu yil birinchi marta 6 yanvar kuni kuzatilgan. O‘shanda foydalanuvchilar onlayn o‘yinlar, striming servislari, bank ilovalari, shuningdek, ijtimoiy tarmoqlar va brauzerlarda muammolarga duch kelgan. Shikoyatlar asosan Ms abonentlaridan kelgan. Roskomnadzor nosozlikka aloqa operatorlaridan birining magistral tarmog‘idagi avariya sabab bo‘lganini bildirdi.