Ziyo tarqatayotgan Farg‘onadagi «velosiped – do‘kon»

«Chekka hududlarda kitob savdosini yanada rivojlantirish, kitobxonlarga yetib bormayotgan kitoblarni tez, arzon va sifatli yetkazish uchun sayyor kitob ko‘chma do‘konini tashkil qildik. Bu g‘oya eng avvalo, sirdaryolik tadbirkor Bekzodjon tomonidan birinchi bo‘lib yaratilgan.

Biz o‘sha tadbirkor g‘oyasidan andoza olib, qo‘shimcha tarzda ikki tomoni ochiladigan, joylarga minib boradigan velosiped do‘kon yasab, g‘oyani yanada takomillashtirdik. Ko‘chma do‘konimiz uchun 10 million so‘mga yaqin mablag‘ sarfladik. Velodo‘konni tayyorlashda juda ko‘p ustalar ishtirok etdi. Velosiped yasaydigan alohida ustalar: svarshiklar, mebelchi, alikafonchilar...

Shunday qilib, ketma-ketlikda bo‘lgan yasash jarayonida ko‘chma do‘konimiz tashkil qilindi», – deydi tadbirkor.

Tadbirkorning ta’kidlashicha, velodo‘kon ko‘pchilikning e’tiboriga tushgan. Ko‘chma do‘kondagi kitoblarni ayniqsa talabalar ko‘proq xarid qilmoqda.

«Velodo‘konga 300 ta kitob sig‘adi. Oliy ta’lim muassasalari, tashkilot, korxonalar atrofiga borib savdo qilyapmiz. Bu g‘oyaning yaratilishi o‘zimizning do‘konlar uchun ham reklama bo‘ldi. Oliygohdagi talabalarga ham kitoblar sifatli va arzon narxda yetib boryapti.

Ko‘chma do‘konimizni yana 5 ta ga ko‘paytirish uchun ustalarga buyurtma berdik. Yaqin kunlarda ular ham bitib savdoga chiqadi. Har bir tumanga eng kamida 1 donadan veloko‘chma kitob do‘koni qo‘yishni rejalashtirganmiz.

Ko‘chma do‘konimizdagi kitob narxlari Farg‘ona kitob do‘konlaridagi kitob narxlari bilan bir xil. Velodo‘konimizga bir nafar ishchi olganmiz. Talab-takliflarga qarab joylarga borilyapti», – deydi Sardor Madg‘oziyev.

Ko‘chma do‘konda kitob savdosi chaqqon. O‘quvchi va talabalar kitob rastasiga bormay turib, ta’lim dargohining o‘zida velodo‘kondan kitob xarid qilishmoqda.

Sarvar Ziyayev, Kun.uz muxbiri

Montaj ustasi: Abduqodir To‘lqinov.