Андижонда профилактика инспекторини пичоқлаган шахс ушланди, Тахтақорача довонида ёнғин чиқди — маҳаллий дайжест

Шавкат Мирзиёев Эронга нисбатан олиб борилган ҳарбий ҳаракатлар ҳақида гапирди. Андижонда профилактика инспекторини пичоқлаган шахс ушланди. Тахтақорача довонида ёнғин чиқди. Тошкент метросининг 13 та бекатида касса ёпилди. Оҳангарон шаҳар ҳокимлигининг мансабдор ходими тезкор тадбирда қўлга олинди. Кун давомида Kun.uz ёритган шу ва бошқа муҳим маҳаллий янгиликлар билан таништирамиз.

{Yii::t(}

Ўтказиб юбориш 6s

Ўтказиб юбориш

Профилактика инспекторини пичоқлаган шахс ушланди

Андижон вилояти Хўжаобод туманида профилактика инспекторини пичоқлаб ўлдирган шахс «Сўқолоқ» қабристонидаги маккапоя ичида яшириниб ётганида ушланди.

Гумонланувчи қўлга олиш жараёнида ўзининг қорин қисмига пичоқ билан жароҳат етказган ҳамда биринчи тез тиббий ёрдам кўрсатилиб, шифохонага олиб борилган.

Ҳозирда мазкур ҳолат юзасидан Жиноят кодексининг «қасддан одам ўлдириш» банди билан жиноят иши қўзғатилган, тергов ҳаракатлари олиб борилмоқда.

Эслатиб ўтамиз, 1 июл куни Хўжаобод туманида оила аъзоларига пичоқ билан таҳдид қилаётган 65 ёшли эркак чақирувга асосан воқеа жойига етиб келган профилактика инспектори Абдурасул Абдувалиевни пичоқ билан жароҳатлаганди. ИИБ ходими шифохонага олиб кетилаётган вақтда вафот этган. Қотил эса воқеа жойидан яширинганди.

«Ташаббусли бюджет»нинг 2-мавсуми 15 июлдан бошланади

«Ташаббусли бюджет» жараёнларининг 2025 йилги 2-мавсуми 15 июлдан бошланиб, 31 август куни охирига қадар давом этади.

Бунда лойиҳани киритиш босқичи — 15 июл – 3 август кунлари, саралаш босқичи — 4-18 август, тарғибот ва овоз бериш босқичи 19-31 август кунлари ўтказилади.

Жорий йилдаги 2-мавсум ғолиблари 1 сентябр — Мустақиллик байрами куни эълон қилинади.

Оҳангарон шаҳар ҳокимлигининг мансабдор ходими тезкор тадбирда қўлга олинди

Оҳангарон шаҳар ҳокимлигининг бўлим бошлиғи қўлга олинди.

Маълум қилинишича, ушбу мансабдор шахс хизмат мавқейидан фойдаланган ҳолда 1958 йилда туғилган фуқаронинг ишончига кириб, ҳозирда ҳокимият балансига ўтказилиши режалаштирилаётган 3 хонали хонадонни суд тизимидаги танишлари орқали унинг номига расмийлаштириб беришни ваъда қилган.

У уйнинг нархини 15 минг долларга келишган ҳамда суд органларидаги танишлари учун 3,5 минг доллар беришини айтиб, жами 18,5 минг доллар талаб қилган. Келишилган пулнинг 9,5 минг долларини олдиндан олган вақтида ДХХ Тошкент вилояти бўйича бошқармаси ва Иқтисодий жиноятларга қарши курашиш департаментининг ҳудудий бошқармаси ходимлари томонидан ашёвий далиллар билан ушланган.

Ҳозирда ҳокимият вакилига нисбатан жиноят иши қўзғатилиб, қамоқ эҳтиёт чораси қўлланган.

Тахтақорача довонида ёнғин чиқди

Қашқадарё вилоятининг Китоб тумани Тахтақорача довонидаги ер майдонларида қуруқ ўт ёниб кетди.

Фавқулодда вазиятлар вазирлигига кўра, 4 июл куни соат 12:08 да бошқармага Қашқадарё вилояти Китоб тумани «Қайнар» МФЙ ҳудудидаги қир-адирликларида қуруқ ўт ёнаётгани тўғрисида хабар келиб тушган.

Шунга кўра, 2 та ёнғин-қутқарув экипажи воқеа жойига етиб бориб, ёнғинни бартараф этиш ишларини бошлаган.

Ижтимоий тармоқларда тарқалган видеоларда ёнғин кучли бўлиб, осмонни тутун қоплаганини кўриш мумкин.

Қайд этилишича, ушбу ёнғин Тахтақорача довонидан ўтган автомобил йўлига хавф солмаган. Довонда икки томонлама автомобиллар ҳаракати давом этмоқда.

«Китоб тумани «Қайнар» МФЙ қир-адирлигида содир бўлган ёнғин ўраб олинган. Ҳозирда ёнғинни бартараф этиш ишлари давом этмоқда. Ёнғин кўлами қисқариб бормоқда. Аҳоли пунктлари ҳамда Тахтақорача довонидан ўтган автомобил йўлида ёнғин хавфи мавжуд эмас», – дейилган вазирлик матбуот хизмати хабарида.

Тошкент метросининг 13 та бекатида касса ёпилди

Тошкент метрополитенининг Мирзо Улуғбек, Халқлар дўстлиги, Пахтакор, Ҳамид Олимжон, Пушкин, Дўстлик, Тошкент, Ойбек, Тинчлик, Шаҳристон, Бодомзор, Минор ҳамда Абдулла Қодирий станцияларида кассалар ёпилди, бунга чипта харид қилиш кўрсаткичи кескин камайгани сабаб бўлди.

Қайд қилинишича, узоқ вақт давом этган кузатув ва ўрганишлар натижаларига кўра, бир қанча метро бекатларидаги вестибюлларда жойлашган кассаларда чипталар ҳарид қилиш кўрсаткичи кескин камайгани аниқланган. Шу боисдан, нақд пул кўринишида тўловни амалга оширувчи йўловчилар сони кам бўлган метро бекатларидаги кассалар ёпилган.

Таъкидланишича, йўловчилар касса ёпилган вестибюлларда автоматлаштирилган тўлов турларининг бошқа усуллари орқали тўлов қилиш имкониятига эга.

Шавкат Мирзиёев Эронга нисбатан олиб борилган ҳарбий ҳаракатлар ҳақида гапирди

Шавкат Мирзиёев Хонкенди шаҳрида Иқтисодий ҳамкорлик ташкилотининг 17-саммитида иштирок этди.

Давлат раҳбари сўзининг аввалида хавфсизлик ва барқарор тараққиётга таҳдид солаётган хавф-хатарларни қайд этди. Ўзбекистон етакчиси можаро ва низоларни дипломатия ва конструктив музокаралар йўли билан ҳал этиш муҳим эканини яна бир бор таъкидлади.

Шу билан бирга, Фаластин-Исроил зиддиятини адолатли ҳал этмасдан туриб, Яқин Шарқда тинчлик ва барқарорликка эришиб бўлмаслиги таъкидланди.

Ўз нутқи давомида Шавкат Мирзиёев халқаро ҳуқуқ ва глобал хавфсизлик институтлари таназзули мулоқот ва ҳамкорликни янада заифлаштириб, куч ишлатиш ва зўравонликка кенг йўл очаётганини билдирди. Хусусан, ташкилот аъзоси бўлган Эрон Ислом Республикасига нисбатан олиб борилган ҳарбий ҳаракатлар бутун минтақани уруш гирдобига тортиши, кенг миқёсдаги экологик ҳалокат ўчоғининг вужудга келиш хавфини туғдириши айтилди.

«Эрон ва Исроил ўртасида ўт очишни тўхтатиш бўйича эришилган келишувни қўллаб-қувватлаймиз. Ушбу қарорни минтақадаги кескинликни юмшатиш, хавфсизликни тиклаш йўлидаги муҳим қадам сифатида баҳолаймиз», — деди Ўзбекистон етакчиси.

Президент ушбу саммит Иқтисодий ҳамкорлик ташкилоти доирасидаги кўп қиррали амалий ҳамкорликка кучли суръат бағишлаши ва янги босқични бошлаб беришига ишонч билдирди.