Трамп Лос-Анжелесга денгиз пиёда аскарлари ва кўпроқ миллий гвардиячиларни юборди

Трампнинг буйруғи билан Калифорнияда 700 нафар денгиз пиёда аскари ва яна 2000 нафар миллий гвардиячи жойлаштирилади. Штат губернатори президентни «антиамерика» чоралари учун судга бериш билан таҳдид қилмоқда.

Фото: AFP

АҚШ федерал ҳукумати антимиграцион рейдларга қарши норозилик намойишлари фонида Лос-Анжелесда жойлаштирилган миллий гвардиячилар сонини икки баробарга, яъни 4000 кишига етказишга қарор қилди. Бу ҳақда Калифорния губернатори Гэвин Нюсом 9 июн, душанба куни X ижтимоий тармоғида маълум қилди.

Миллий гвардиянинг янги бўлинмаларидан ташқари Калифорниядаги "Кэмп-Пендлтон" базасидан 700 нафар денгиз пиёда аскарлари ҳам Лос-Анжелесга юборилади. АҚШ президенти маъмурияти бу қарорни «федерал ходимлар ва биноларга нисбатан таҳдидларнинг кучайиши» билан изоҳлади, деб ёзади AFP.

АҚШ президенти Доналд Трамп Лос-Анжелесда давом этаётган норозилик намойишларини изоҳлар экан, «профессионал агитаторлар ва исёнчиларни» тартибсизликларни келтириб чиқарганликда айблади. У Калифорнияга маҳаллий ҳокимиятларга эмас, балки федерал марказга бўйсунадиган куч тузилмаларининг янада кўпроқ вакилларини юбориш билан таҳдид қилди. Truth Social ижтимоий тармоғидаги постида Трамп юборилган аскарларга «ҳурматсизлик» кўрсатадиган намойишчиларга зўравонлик билан таҳдид қилди.

Калифорния губернатори Гэвин Нюсом АҚШ президенти Доналд Трамп маъмуриятидан Лос-Анжелесга Миллий гвардия «қўшинларини ноқонуний жойлаштириш» ҳақидаги қарорини бекор қилишни расман талаб этди.

«Трамп аралашмагунча муаммога дуч келмадик. Бу давлат суверенитетини жиддий бузиш — кескинликни кучайтириб, ресурсларни ҳақиқатан ҳам зарур бўлган жойдан чиқариб юбориш», деб ёзган Нюсом постида ва унга Пентагон раҳбари Пит Ҳегсетга мурожаати суратини илова қилган.

Нюсом постда таъкидлаганидек, агар вазият давлат ҳокимиятига таҳдид соладиган хорижий босқин ёки қўзғолонларга тааллуқли бўлмаса, у минтақа раҳбари сифатида федерал ёрдам сўраш тўғрисида қарор қабул қилиши керак. Вашингтон назорати остида Лос-Анжелесга Миллий гвардия қўшинларининг киритилиши «вазиятни жиддий равишда кучайтириш» билан таҳдид солади – бу қарор бекор қилиниб, минтақавий бўлинмалар маҳаллий ҳокимият назоратига қайтиши керак, деди сиёсатчи.

#АҚШ #Лос-Анжелес #Доналд Трамп