Зеленский Трамп билан «мега келишув»ни муҳокама қилаётганини айтди

Украина президенти Володимир Зеленский ва АҚШ президенти Доналд Трамп қуроллар савдоси бўйича келишувни муҳокама қилмоқда. Унга кўра, АҚШ Украинадан жангларда синовдан ўтган дронларни сотиб олади. Эвазига, АҚШ Украинага ўз қуролларини сотади.

Зеленский The New York Post нашрига берган интервюсида Трамп билан сўнгги музокаралари АҚШ ва Украинага авиация технологияларини мустаҳкамлашга ёрдам берадиган келишувга бағишланганини айтди. Унинг сўзларига кўра, Киев Россия билан қарама-қаршилик чоғида замонавий урушлар бўйича ўрганган барча нарсани АҚШ билан баҳам кўришга тайёр.

«Менимча, бу ҳамма учун фойдали бўлган ҳақиқий «мега битим», деди Зеленский.

The New York Post таъкидлаганидек, Украина дронлари Россия ҳудуди ичидаги нишонларга зарба бера олади. Зеленский 16 июл куни берган интервюсида «Америка халқига бу технология керак ва бу сизнинг арсеналингизда бўлишингиз керак», деди.

«Биз бу тажрибани Америка ва бошқа европалик ҳамкорлар билан баҳам кўришга тайёрмиз», деб қўшимча қилди Зеленский. Унинг айтишича, Украина Дания, Норвегия ва Германия билан ҳам бу борада музокаралар олиб бормоқда.