АҚШ суди Ҳарвард халқаро талабалари учун виза чекловини вақтинча тўхтатди

АҚШда федерал судя президент Доналд Трамп маъмуриятининг Фаластинни қўллаб-қувватлаши билан танилган Ҳарвард университетида ўқишга интилаётган хорижлик талабалар учун визани чеклаш ҳақидаги қарорини вақтинчалик тўхтатди.

Бостон округ суди судяси Эллисон Берроуз бу қарорни Ҳарвард расмийлари президент буйруғига эътироз билдирганидан сўнг чиқарди. Берроузнинг таъкидлашича, агар суд жараёни давомида буйруқ ўз кучида қолса, университет «зарар кўриши» мумкин.

5 июн куни имзоланган буйруқ F, M ва J визалари билан АҚШга қабул қилинган янги халқаро талабалар киришини вақтинча тақиқлайди. Судя, шунингдек, Трамп маъмуриятининг Ҳарвардга халқаро талабаларни қабул қилишни вақтинча тўхтатиш тўғрисидаги олдинги буйруқни узайтирди.

Федерал амалдорлар аввалроқ Фаластин ва хилма-хиллик, тенглик ва инклюзивлик дастурларини қўллаб-қувватлаш учун кампусдаги норозиликларга асосланиб, бир нечта университетларни, жумладан Ҳарвардни молиялаштиришни тўхтатиш билан таҳдид қилган. Ушбу саъй-ҳаракатларнинг бир қисми сифатида антисемитизмга қарши курашиш учун Адлия вазирлиги, Соғлиқни сақлаш ва аҳолига хизмат кўрсатиш вазирлиги, Таълим вазирлиги ва Умумий хизматлар бошқармаси иштирок этувчи қўшма идоралараро ишчи гуруҳ тузилди.

Трамп маъмурияти 2,2 миллиард доллар федерал молиялаштириш ва Ҳарвард учун 60 миллион долларлик шартномаларни музлатиб қўйди. Университет бунга жавобан судга мурожаат қилиб, чоралар қонунни бузганини таъкидлади.

Миллий хавфсизлик котиби Кристи Ноэм университетга халқаро талабаларни қабул қилиш тўхтатилгани ҳақида хат юборди. Бироқ, судя Берроуз бу қарорни ҳам вақтинча блоклаб қўйди.