Истанбулда ўзбекистонлик аёл эрини ўлдиришда гумонланмоқда

Туркиянинг Истанбул шаҳрида ўзбекистонлик аёл турмуш ўртоғини пичоқлаб ўлдирди. Бу ҳақда маҳаллий нашрлар хабар тарқатди.

Хабарларда айтилишича, 6 апрел куни Истанбулнинг Картал туманида яшовчи эр-хотин ўртасида жанжал келиб чиққан. Жанжалга молиявий муаммолар сабаб бўлгани, жараён давомида Ўзбекистон фуқароси, 28 ёшли С.Т. ошхонадан пичоқ олиб, 42 ёшли Э.Э.ни яралагани маълум қилинган.

Шундан сўнг С.Т. таксопаркка қўнғироқ қилиб, турмуш ўртоғи касалхонага бориши кераклигини айтиб, машина сўраган. Такси ҳайдовчиси ҳушсиз ётган эркакни кўриб, тез ёрдам чақирган. Воқеа жойига етиб келган шифокорлар унинг ўлимини қайд этган. Аёл полиция ходимлари томонидан қўлга олинган.

Маълум бўлишича, 4 йил олдин турмуш қурган жуфтликнинг бир нафар фарзанди бор.

Ўзбекистоннинг Истанбул шаҳридаги Бош консулхонаси айбланаётган фуқаронинг холаси билан суҳбатлашгани ҳақида хабар берди. Унга кўра, ҳақиқатан ҳам, мазкур воқеа юзасидан гумонланувчи ҳуқуқни муҳофаза қилувчи органлар томонидан ушланган.

Дастлабки маълумотларга кўра, Туркия фуқароси спиртли ичимлик истеъмол қилган, у ўзбекистонлик аёлига нисбатан мунтазам равишда жисмоний ва руҳий босим ўтказиб келган.

Консулхона хабарида воқеа содир бўлган вақтда хонада бошқа шахслар ҳам бўлгани айтилади. «Дастлабки терговга кўра, марҳум аёлни бўғаётган пайтда орқа томондан пичоқ билан жароҳатланган. Бу эса уни бошқа шахс томонидан пичоқланган бўлиши эҳтимолини истисно этмайди», – дея қўшимча қилинади хабарда.

Айбланувчининг холаси, ўз навбатида, ҳали унинг жияни суд томонидан айбдор деб топилмагани, шунинг учун воқеа ҳақида хабар тарқатаётганда буни ҳисобга олишни сўради. Шунингдек, воқеадан сўнг айбланувчининг онаси фалаж бўлиб қолганини қўшимча қилди. «Сиз билмаган кўп нарса бор», – дейди у.

Ўзбекистон фуқаросига зарур консуллик-ҳуқуқий ёрдам кўрсатилаётгани ва унга адвокат бириктирилгани қайд этилди. Ҳолат Бош консулхона томонидан назоратга олинган.