Жанубий Кореяда туғилиш кўрсаткичи тўққиз йил ичида биринчи марта ўсди

Жанубий Кореяда 2024 йилда туғилиш коэффициенти (бир нафар аёлга тўғри келадиган ўртача болалар прогнози) 0,75 гача кўтарилди — ўтган йили ушбу кўрсаткич 0,72 ни ташкил этганди.

Туғилишнинг ўсиши тўққиз йил ичида биринчи марта қайд этилмоқда, аммо кўрсаткич дунёда энг пастлигича қоляпти. Financila Times’нинг ёзишича, аҳоли сонининг барқарорлигини таъминлаш учун 2,1 даражадаги коэффициент талаб этилади.

Ўтган йилги ўсиш қисман пандемиядан кейин қурилган оилалар сонининг ошгани билан боғлиқ. 2024 йилда мамлакатда турмуш қуришлар сони 14,9 фоизга ошиб, 2019 йилдан бери максимал кўрсаткичга чиққан — 222 минг 422 та.

«Ижтимоий қадриятлар ўзгарди, турмуш қуриш ва фарзанд кўриш ҳақидаги қарашлар яхшиланди», — дейди мамлакат статистика идораси вакили Пак Хён Жун.

Унинг таъкидлашича, ҳар бир омил янги туғилган чақалоқлар сонининг кўпайишига қанчалик ҳисса қўшганини баҳолаш қийин, лекин улар ҳам бир-бирига таъсир қилган.

Мамлакат шаҳарлари орасида туғилишнинг энг паст коэффициенти Сеулда қайд этилган — 0,58. Пойтахтда 51 миллион аҳолига эга Жанубий Кореянинг қарийб 20 фоизи истиқомат қилади. Энг юқори кўрсаткич Сежонда — 1,03. Ушбу шаҳарда аксарият ҳукумат муассасалари жойлашган.