Песков: Киев билан муносабатлар — Москва «вазифалари» бажарилганидан кейин

Россия ва Украина ўртасидаги бўлажак муносабатлар мавзуси «ҳозир ўта назарий савол», бу муносабатлар «СВО вазифалари» (Россиянинг Украинадаги уруши) бажарилгандан кейингина қурилади, деди Россия президенти матбуот котиби Дмитрий Песков ТАСС давлат агентлигининг саволига жавоб берар экан.

«Биз учун буни сиёсий ва дипломатик воситалар билан қилиш афзалроқ ва СВО бу воситалар имконсиз бўлиб қолган, мулоқот бўйича барча таклифлар Украинанинг ўзи ва ғарбликлар томонидан рад этилган шароитда давом этмоқда», деди матбуот котиби. Унга кўра, аввало вазиятни ҳал қилиш, кейин муносабатлар қандай йўлга қўйилиши ҳақида ўйлаш керак.

Бундан уч кун аввал Песков Россия Федерацияси ва Украина президентлари ўртасида 14 июл куни АҚШ президенти Доналд Трамп томонидан эълон қилинган 50 кунлик ултиматум муддати тугагунга қадар тўғридан тўғри учрашув ўтказиш эҳтимолига шубҳа билан қараганди. У яна бир бор бундай учрашув «келишувга чек қўйиши ва ушбу келишувларнинг ишлаб чиқиладиган усулларини ишлаб чиқиш йўлини аниқлаш керак»лигини таъкидлади. Унинг фикрича, бу жараён 30 кун ичида амалга ошмайди.

Американинг Bloomberg ахборот агентлиги манбаларга таяниб, 16 май куни Украина билан бир кун аввал Истанбулда бўлиб ўтган тўғридан тўғри музокараларнинг биринчи раундида Россия илгари сурган асосий шартлар рўйхатини эълон қилди.