Трамп иммиграция ва божхона полициясига «тўлиқ ваколат» тақдим этди

АҚШ президенти Доналд Трамп Иммиграция ва божхона полицияси (ICE)га зобитларига ҳужумга учраган тақдирда ўзларини ҳимоя қилиш учун «тўлиқ ваколат» беришини айтди. Бу ҳақда у Truth Social ижтимоий тармоғида тошқиндан жабр кўрган Техас штатига ташриф буюрганидан кейин ёзган.

Трамп «бандитлар» ICE хизмат автомобилларига тош отганига гувоҳ бўлганини айтди.

«Ушбу янги машиналарга катта зарар етган», деди у.

Унинг сўзларига кўра, ҳужумга учраган ICE зобитлари зудлик билан машиналаридан чиқиб, ҳужумчиларни қўлга олиши керак.

«Мен иммиграция ва божхона полициясига жамоатчиликни ҳимоя қилганидек, ўзларини ҳимоя қилиш учун тўлиқ ваколат бераман», деди Трамп.

Шунингдек, у ҳуқуқ-тартибот идоралари ходимларига «ҳибсга олиш ва қамоққа жойлаштириш» ваколатлари берилганини таъкидлади.

Бир кун аввал Трамп ва унинг рафиқаси Мелания 4 июл куни Техасдаги сув тошқинида ҳалок бўлганларнинг оила аъзолари билан учрашиб, ҳамдардлик билдирди.