Sergeli City'нинг айрим блокларида қурилиш ишлари тўхтатилди

Қурилиш вазирлигига кўра, мажмуанинг бешта блокида қурилиш-монтаж ишлари давлат рўйхатидан ўтмасдан бошлаб юборилган. Бундан ташқари, бетон устунлар юзасида ғоваклар борлиги, фундамент қисмида сув тўплангани каби камчиликлар аниқланган. Тадбиркор Марат Ҳамдамов давлат органининг баёнотини рад этди.

Қурилиш вазирлиги эълон қилган видеодан кадр

Тошкент вилояти Қуйи Чирчиқ тумани Сурум маҳалласида кўп қаватли турар жой мажмуасининг бир қисми давлат рўйхатидан ўтмасдан, белгиланган ҳужжатларсиз қурилаётгани аниқланди. Бу ҳақда Қурилиш вазирлиги хабар берди.

Қурилиш соҳасида назорат инспекциясининг Kun.uz'га аниқлик киритишича, қурилиши тўхтатилган объект – Sergeli Сity турар жой мажмуаси ҳисобланади.

“Бу ерда А8 блоккача рўйхатдан ўтган. А9, А10 ва А11 блоклар рўйхатдан ўтмаган бўлса-да, қурилиш-монтаж ишлари бошлаб юборилган. Рўйхатдан ўтказилгунга қадар объектда қурилиш-монтаж ишлари тўхтатилди. Шу билан бирга, D1 ва D2 блокларида ҳам худди шу ҳолат: рўйхатдан ўтмаган, лекин қурилиш-монтаж ишлари бошлаб юборилган”, – дейди инспекция масъули.

Бундан ташқари, мониторинг жараёнида ишчилар хавфсизлиги таъминланмагани, юк кўтарувчи бетон юзаларда ғоваклар мавжудлиги аниқланган. Бундан ташқари, объектнинг остида сув тўпланиб қолгани кузатилган.

Расмий хабарда айтилишича, бино фундамент қисмига дренаж сув қочириш тизимлари ўтнатилиши кўзда тутилган, лекин ўрнатилмаган, шу сабаб фундамент сув остида қолган, бу эса бино фундаментига зарар етишига олиб келади.

“Сифатсиз бажарилган ишлар бузилиши, ишчилар хавфсизлигини тўлиқ таъминлаш ҳамда ҳудуд дренаж тизимларини ўрнатиш бўйича инспекция ходимлари томонидан белгиланган муддатда бажарилиши шарт бўлган ёзма кўрсатмалар белгиланди. Ушбу камчиликлар бартараф этилгунга қадар мазкур блокларда ҳам қурилиш ишлари вақтинчалик тўхтатилди”, – дейилади хабарда.

Sergeli city лойиҳасининг ижтимоий тармоқлардаги саҳифаларида келтирилишича, мажмуада 5000 дан ортиқ хонадонлар бўлади. Турар-жойлар 2025-2026 йилларда фойдаланишга топширилиши айтилган.

Лойиҳани “Transport Free Group” МЧЖ амалга оширмоқда. Давлат реестрида компания таъсисчиси сифатида Абдукомилов Беҳруз Баҳром ўғли, раҳбар сифатида Маматов Олим Ташназарович кўрсатилган.

Шу билан бирга, ижтимоий тармоқларда тадбиркор Марат Ҳамдамов ўзини Sergeli City лойиҳасининг асосчиси сифатида тақдим этиб келади. У Instagram'даги постида қурилиш ишлари бутунлай эмас, вақтинча тўхтатилганини билдирган. “Барча ишларимиз қонун доирасида амалга оширилган”, деб ёзган у.

Аввалроқ, Ўзбекистонда 1 июлдан уй сотиб олишда эскроу тизими жорий этилганди.

#қурилиш #Sergeli city