РФ мудофаа вазирлиги «Пасха сулҳи» якунланганини эълон қилди

Россия мудофаа вазирлиги президент Владимир Путин томонидан эълон қилинган «Пасха сулҳи» муддати якунлангани ва ҳарбий амалиёт қайтадан тикланганини эълон қилди. Россия ҳарбийлари Белгород, Харкив, Донецк ва Херсон областларидаги юриш амалиётлари тўғрисида маълумот берган.

Вазирлик баёнотида таъкидланишича, вақтинчалик сулҳ амал қилган давр мобайнида «махсус ҳарбий амалиёт ҳудудидаги барча қўшинлар ўт очишни тўхтатиш режимига қатъий риоя этган ҳамда олдин эгалланган марраларда қолган».

«Пасха сулҳи»ни Путин 19 апрел куни кечқурун бир томонлама тартибда эълон қилганди. У шанба куни соат 18:00 дан душанба кунига қадар Россия қўшини бутун фронт чизиғи бўйлаб ҳарбий ҳаракатларни тўхтатишини маълум қилганди. Украина президенти Володимир Зеленский ҳам агар россиялик ҳарбийлар сукунат режимига амал қиладиган бўлса, украин армияси ҳам шундай йўл тутишини ваъда қилганди.

Сулҳга риоя қилиниши устидан қандайдир мустақил назорат йўқ эди. Натижада томонлар бир ярим кун давомида мунтазам равишда бир-бирини ўт очишни тўхтатиш режимини бузганликда айблаб келди. Зеленский 20 апрел куни тонгида Россия қўшинлари «сулҳ таассуротини яратишга ҳаракат қилаётгани», аммо фронт чизиғида олдинга силжишга уринишларини тўхтатмаётганини айтиб чиқди. Шу билан бирга, Украина ҳарбийлари баъзи йўналишларда ҳужумлар интенсивлиги пасайганини тасдиқлади. 21 апрел куни эрталаб эса Зеленский бир ярим кун ичида Россия ҳарбийлари томонидан сулҳни бузиш бўйича 2935 та ҳолат қайд этилганини маълум қилди.

Россия мудофаа вазирлиги ўз ҳисоботида Украина қуролли кучлари ўт очишни тўхтатиш режимини 4900 марта бузганини иддао қилди. Россия ҳарбий идорасининг таъкидлашича, Украина қуролли кучлари Курск области ва Донбассда ҳужумлар уюштирган, шунингдек, дронлар ва артиллерия билан Россия қўшинлари позицияларига зарбалар йўллаган.

Шу билан бирга, Киев ҳам, Москва ҳам душман томонидан жанговар ҳаракатлар интенсивлиги пасайганини тан олишди. Якшанба куни кечқурун Зеленский «ҳеч бўлмаганда ҳаво тревогаси бўлмагани»ни қайд этди. У ҳаводан узоқ масофали қуроллар билан ҳужум қилинмаслигини «эришилган ва давом эттириш энг осон бўлган сукунат формати» деб атади. Украина президенти 30 кун муддатга узоқ масофали қуроллар билан ҳаво ҳужумлари йўллашдан воз кечишни таклиф қилди.

«Украина фуқаролик инфратузилмасига узоқ масофали дронлар ва ракеталар билан ҳар қандай зарба беришдан камида 30 кун муддатга воз кечишни таклиф қилади. Агар Россия бундай қадамга рози бўлмаса, бу унинг бундан кейин ҳам фақат одамлар ҳаётини вайрон қиладиган ва урушни давом эттирадиган ишларни қилишни хоҳлаётганининг исботи бўлади», – деди Зеленский.

АҚШ Давлат департаменти Зеленскийнинг ярашувни узайтириш таклифини олқишлади. Аммо Россия президенти матбуот котиби Дмитрий Песков навбатдаги брифингда Кремлнинг ўт очишни тўхтатиш ҳақидаги баёноти бир марталик бўлгани ва янги сулҳ ҳали режалаштирилмаганини маълум қилди. «Сиз мудофаа вазирлигимизнинг ҳарбий нуқтайи назардан баҳо бериш ваколатига эга бўлган баёнотини эшитдингиз. Баҳо берилди. Украина томонидан қоидабузарлик ҳолати бўйича маълумотлар берилди. Бошқа қўшимча қиладиган гапим йўқ. Бу президент Путиннинг Пасха ташаббуси эди», – деди у журналистларга.

Путин Трамп яқин кунларда ўт очишни тўхтатиш бўйича ҳақиқий ҳаракатларни кўрмаса, дипломатик келишувга уринишларни тўхтатиш билан таҳдид қилганидан бир кун ўтиб, кутилмаганда қисқа муддатли сулҳ эълон қилганди. Ҳозирда АҚШ эҳтимолий тинчлик келишуви ва урушдан кейинги тузум режаси устида ишлашни давом эттирмоқда – шу ҳафта Лондонда АҚШ, Украина ва унинг европалик иттифоқчилари иштирокида навбатдаги музокаралар бўлиб ўтиши кутилмоқда.

Кремл уруш тугаши эҳтимолий муддатларни айтишдан бош тортмоқда

Дмитрий Песков бугунги брифингда яна бир бор тинчлик шартномасини тузишнинг эҳтимолий муддатлари ҳақида изоҳ беришдан бош тортди. У АҚШ президенти Доналд Трампнинг Россия ва Украина ўртасидаги келишув шу ҳафтадаёқ тузилиши мумкинлиги ҳақидаги баёнотига шундай изоҳ берди.

«Мен ҳозир ҳеч қандай изоҳ беришни истамасдим, айниқса вақт доираси ҳақида. Президент Путин, Россия томони масалани тинч йўл билан ҳал қилиш йўлини излашга очиқ, Америка томони билан ишлашни давом эттирмоқда. Ва албатта, умид қиламизки, бу иш ўз натижасини беради», – деди Кремл вакили.

Трамп бир кун олдин ўзига тегишли Truth Social ижтимоий тармоғида Москва ва Киев «шу ҳафтадаёқ» келишувга эришиши мумкинлигини ёзганди. «Шундан сўнг иккала давлат ҳам АҚШ билан катта бизнес қила бошлайди, улар гуллаб-яшнайди ва бойлик орттиради», – деганди Трамп. У бундай фикр нимага асосланганига аниқлик киритмади. Киевда унинг баёнотларига изоҳ берилмаган.

Трамп мунтазам равишда ҳарбий ҳаракатларни тўхтатишнинг эҳтимолий муддатлари бўйича ўта оптимистик прогнозлар билан чиқиш қилиб келади. У президент этиб сайланишидан олдин ҳам урушни «24 соат ичида» тугатишга ваъда берган, бироқ кейинчалик можаро у ўйлаганидан кўра мураккаброқ эканини тан олган ҳамда Оқ уйга қайтганидан бери ҳарбий ҳаракатларни тугатиш учун «бир неча ҳафта» кераклигини айта бошлаганди.