OpenAI Илон Маскнинг «доимий босимлари» сабаб судга даъво киритди

Америкалик OpenAI компанияси Илон Маскка қарши даъво аризаси киритиб, уни компанияга нисбатан тизимли босим ўтказишда айблади. ChatGPT сунъий интеллектини ишлаб чиқарган компания федерал судга мурожаат қилиб, Маскнинг «ноқонуний ҳаракатларни давом эттиришини тақиқлаш»ни сўради, деб ёзмоқда Reuters.

«Илоннинг бизга нисбатан тўхтовсиз ҳаракатлари — бу шунчаки виждонсиз тактикалар бўлиб, OpenAIʼни секинлаштириш ва сунъий интеллект соҳасидаги етакчи инновациялар устидан назоратни шахсий манфаатлари йўлида қўлга киритишга қаратилган ҳаракатдир», — дейилади OpenAI хабарида.

Калифорния Шимолий округи судига киритилган даъвода таъкидланишича, Маск ижтимоий тармоқлар орқали компанияга таъналар ёғдирган, асоссиз суд даъволарини киритган ва компания обрўсига путур етказиш ҳамда назоратни қўлга киритиш учун муваффақиятсиз уринишларни амалга оширган.

Reutersʼнинг ёзишича, OpenAI тижорий моделга ўтгани суд можароларини келтириб чиқарган — компания 40 миллиард доллар миқдорида молиялаштиришни жалб этиш учун буни зарур қадам деб ҳисоблайди. Маск компания директорлар кенгашидан чиқишини эълон қилганида айнан OpenAI’нинг тижорий фолият билан шуғулланишга ўтганини сабаб қилиб кўрсатганди.

OpenAI 2015 йилда ташкил этилган. У вақтда компаниянинг икки раиси бор эди — Илон Маск ва Сэм Алтман. Компания «сунъий интеллект соҳасида нотижорий ва инсониятга фойда келтирадиган тадқиқотлар билан шуғулланиши» белгиланган. Аммо 2018 йилда Маск компания тижорий фаолиятга ўтганидан норози бўлиб, компанияни тарк этган.

2024 йилда Маск OpenAI фойда кўриш учун нотижорий миссиясидан чекинганини билдириб, компания ва Алтманни судга берганди. Алтман айбловларни рад этиб, Маск сунъий интеллект соҳасидаги рақибининг фаолиятига халақит беришга уринаётганини таъкидламоқда. Декабр ойида OpenAI Маск OpenAI’нинг тижорий тузилмага айланишини қўллаб-қувватлагани, бироқ унинг устидан назоратни қўлга кирита олмагани учун кетгани келтирилган ҳужжатларни эълон қилди.

Жорий йилнинг февралида Маск OpenAI’ни сотиб олиш учун 97,4 миллиард доллар таклиф қилди. Аммо корпорация директорлари унга рад жавобини қайтарди. Алтман эса OpenAI сотилмаслигини айтиб, Маск эгалик қилаётган Х ижтимоий тармоғи учун 9,74 миллиард доллар таклиф қилди.