АҚШ Сенати Россияга қарши янги санкциялар пакетини тақдим этди

Америка сенаторларининг ярми Украинада тинчлик ўрнатишдан бош тортгани учун Россияга қарши янги санкциялар тўғрисидаги қонун лойиҳасини олдиндан қўллаб-қувватлади. Парламент аъзолари Россия нефти ва уранини сотиб олган барча мамлакатларга 500 фоизлик йиғим билан таҳдид қилмоқда.

Ричард Блюментал ва Линдси Грэҳэм Фото: REUTERS/Valentyn Ogirenko

АҚШ Сенатининг 50 нафар аъзосидан иборат гуруҳ, агар Украинадаги тинчликдан бош тортса, Россияга қарши янги санкциялар жорий этилишини назарда тутувчи қонун лойиҳасини тақдим этди. Бу ҳақдаги пресс-релиз 1 апрел, сешанба куни республикачи сенатор Линдси Грэҳэм ва демократ сенатор Ричард Блюменталнинг сайтларида эълон қилинди..

«Агар Россия Украина билан узоқ муддатли тинчлик музокараларидан бош тортса ёки тинчлик ўрнатилгандан сўнг Украина суверенитетига путур етказадиган ҳарбий аралашувни ўз ичига олувчи бошқа ҳаракатларни амалга оширса, бу санкциялар қўлланади. Қонун лойиҳаси, шунингдек, Россиядан нефт, газ, уран ва бошқа маҳсулотларни сотиб олувчи давлатлар товарларига 500 фоизлик тарифни жорий қилади», дейилади баёнотда.

«АҚШ Сенатида Россия тажовузкор эканлиги, бу даҳшатли уруш ва Путиннинг тажовузкорлиги ҳозирдан тўхтатилиши ва келажакда тийиб турилиши керак, деган мутлақ консенсус мавжуд, - деди Грэҳэм ва Блюментал. - Биз президент Трампнинг Россиядан ўт очишни тўхтатиш келишуви масаласи бўйича ҳафсаласи пир бўлганини тушунамиз ва унинг барқарор, адолатли ва муносиб тинчликка содиқлигини қўллаб-қувватлаймиз».

«Умид қиламизки, 2025 йилда президент Трамп ва унинг жамоаси дунё ўтмишда эриша олмаган нарсага эришади: Россиянинг Украинага қарши тажовузкорлигига якуний чек қўйиш ва эркин ва демократик Украинани қўллаб-қувватлаш», — дея хулоса қилди сенаторлар.

#Россия #АҚШ