АҚШ Миллий хавфсизлик кенгашининг қатор юқори мартабали амалдорлари лавозимдан олинди

АҚШ Миллий хавфсизлик кенгашининг бир нечта юқори мартабали амалдори 3 апрел куни эгаллаб турган лавозимларидан озод этилди, деб хабар бермоқда Reuters.

«Вазиятдан хабардор уч кишининг сўзларига кўра, пайшанба куни эрталаб Оқ уй ҳузуридаги Миллий хавфсизлик кенгашининг бир нечта директори лавозимдан бўшатилган», — дейилади хабарда.

Агентлик манбалари масъулларнинг ишдан бўшатилишига нима сабаб бўлганини айтмаган, аммо икки суҳбатдош мазкур ҳолатни ходимларга нисбатан текширув натижаларига боғлаган. Таъкидланишича, лавозимдан олингалар орасида технология ва миллий хавфсизликка масъул катта директор Дэвид Фейт ҳам бор.

Сўнгги бир неча ҳафта ичида Доналд Трамп жамоаси фаолияти билан боғлиқ бир нечта можаро юз берди. Иккита воқеа АҚШ президентининг миллий хавфсизлик бўйича маслаҳатчиси Майк Уолц билан боғлиқ. Аввалига у Ямандаги ҳусийларга бериладиган зарбаларга оид махфий маълумотлар тарқалиб кетишига аралашиб қолди, кейин эса унинг ёрдамчилари ҳарбий масалаларни муҳокама қилишда Gmail почта манзилидан фойдаланиб келгани маълум бўлди. Шундан кейин ОАВ маълумотларига кўра, маъмуриятдаги айримлар унинг истеъфосини талаб қилган.

Аввалроқ Майк Уолц Сигнал мессенжеридан Россия—Украина урушини тинч йўл билан ҳал этиш масаласини муҳокама қилишда ҳам фойдалангани маълум бўлган эди.