АҚШ ва Хитой вакиллари БМТ Хавфсизлик Кенгашида Украина бўйича жанжаллашди

БМТ Хавфсизлик Кенгашининг сўнгги йиғилишида АҚШ ва Хитой делегациялари ўртасида баҳс-мунозара бўлиб ўтди. Муҳокаманинг асосий мавзуси Украинадаги вазият бўлди, деб хабар берди Reuters.

Америка вакили Хитой томонини кескин танқид қилди ва Украина ҳудудида «Россия тажовузини қўллаб-қувватлашни тўхтатишни» талаб қилди. АҚШнинг БМТдаги муваққат ишлар вакили Дороти Ши Хитой Россияга ҳарбий-саноат мажмуасини ривожлантиришга ёрдам берадиган ускуналар етказиб беришни тўхтатиши шартлигини айтди.

Хитой вакили Гэн Шуан барча айбловларни рад этди ва Хитой можаронинг бошиданоқ нейтрал позицияни эгаллаганини таъкидлади. Унинг сўзларига кўра, «Пекин ҳеч қачон томонларга қурол етказиб бермаган ва Россия-Украина можаросида иштирок этмаяпти».

Шунингдек, Гэн Шуан Вашингтонни Украинадаги вазият учун жавобгарликни бошқаларга юклашга уринишни тўхтатишга ва қарама-қаршиликни янада кучайтирмасликка чақирди. Хитой вакили АҚШга ўт очишни тўхтатиш ва тинчлик музокараларини бошлашга кўмаклашиш масалаларида янада конструктив позицияни эгаллашни тавсия қилди.

«Агар Хитой чин дилдан тинчликка чақираётган бўлса, Россия агрессиясини қўллаб-қувватлашни бас қилиши керак», деди Ши.

Аввалроқ, Reuters агентлиги Россия Хитойдан камикадзе дронларини ишлаб чиқаришда фойдаланиладиган двигателларни олишда давом этаётгани ҳақида ёзган эди.