Сильвестр Сталлоне Warner Bros.'ни 24 йил аввалги фильм сабаб судга берди

Фото: Getty Images

Ҳолливудлик актёр Сильвестр Сталлоне Warner Bros. Entertainment’ни судга берди. У компанияни "Бузғунчи" ("Demolition Man, 1993) фильмидан тушган даромадлардан улуш тўламаганликда айбламоқда. Бу ҳақда Bloomberg хабар берди.

Маълумотларга кўра, Лос-Анжелес судига юборилган даъво аризасида актёр шартнома бандларига кўра, картина умумий ҳисобда 125 млн. доллардан кўпроқ маблағ ишлаб топса, бу маблағнинг 15 фоизини олиши керак бўлган. Сталлонега тегишли Rogue Marble Productions компанияси баёнотига кўра, "Бузғунчи" фантастик жангари фильми жаҳон прокатида 159 млн. доллар ишлаб топган.

Бироқ Warner Bros. бюджети 57 млн. доллар бўлган фильм ўз харажатларини қопламагани ҳақида маълум қилган. Шундан сўнг, Rogue Marble Productions воқеага ойдинлик киритишни талаб қилди, киностудия эса Сталлонега ҳеч қандай тушунтиришларсиз 2,8 млн. долларлик чек юборган.

"Киностудиялар хасислиги билан машҳур", - дея Rogue Marble баёнотидан иқтибос келтиради Bloomberg.

Bloomberg маълумотларига кўра, 70 ёшли актёр судда ғалаба қозониб, киностудияларнинг шундай алдовли хатти-ҳаракатига чек қўйиш ниятида.

#суд #Сильвестр Сталлоне #Warner Bros.