Erdo‘g‘an: Netanyahuning G‘azodagi genotsiddan e’tiborni chalg‘itishiga yo‘l qo‘yish kerak emas

Prezident Rajab Toyyib Erdo‘g‘an Qatar bosh vaziri va tashqi ishlar vaziri Muhammad bin Abdulrahmon Al-Tani bilan uchrashuvda, Isroilning Eronga qarshi hujumlari G‘azodagi genotsiddan e’tiborni chalg‘itmasligi uchun sa’y-harakatlar davom etadi dedi.

Turkiya rahbari Istanbul shahrida bo‘lib o‘tadigan Islom hamkorlik tashkiloti Tashqi ishlar vazirlari kengashi yig‘ilishida ishtirok etish uchun Turkiyaga tashrif buyurgan Al-Tanini qabul qildi, deb xabar berdi prezident Aloqa boshqarmasi.

Uchrashuvda Turkiya va Qatar o‘rtasidagi ikki tomonlama aloqalar bilan bir qatorda mintaqaviy va global masalalar muhokama qilindi.

Prezident Erdo‘g‘an Isroilning Eronga uyushtirgan hujumlaridan so‘ng jadal diplomatik faoliyat boshlanganiga diqqat qaratib, mintaqa davlatlarining boshqa urushga chiday olmasligini, Suriya va Iroqning bu to‘qnashuvga tortilmasligi muhimligini, taranglikni kamaytirish va diplomatiya uchun maydon ochish zarurligini ta’kidladi.

Isroilning harakatlarini to‘xtatish va yadroviy kelishmovchilikni hal qilish uchun muzokaralarga qaytishning muhimligini ta’kidlagan Erdo‘g‘an, bu maqsadlarga erishishda ayniqsa mintaqa davlatlarining sa’y-harakatlari foydali bo‘lishini qayd etdi. Shuningdek, u Isroilning Eronga qarshi hujumlari e’tiborni G‘azodagi genotsiddan chalg‘itmasligi uchun ish davom etishini va kuchaytirilishini, Isroil bosh vaziri Binyamin Netanyahuga esa bunday imkoniyat berilmasligini aytdi.