Tramp Istanbuldagi Ukraina-Rossiya muzokaralarida ishtirok etishi mumkin

AQSh prezidenti Donald Tramp Istanbulga 15 may kuni, Rossiya va Ukraina o‘rtasida urush bo‘yicha muzokaralar o‘tkazilishi mumkin bo‘lgan kuni shaxsan o‘zi uchib ketishi mumkinligini aytdi. Bu haqda Tramp 12 may, dushanba kuni jurnalistlarga ma’lum qildi.

«Men uchib kelish haqida o‘yladim. Payshanba kuni qayerda bo‘lishimni bilmayman. Ko‘p uchrashuvlarim bor, lekin aslida uchib borish haqida o‘yladim. Agar biror narsa bo‘lishi mumkinligini tushunsam, shunday imkoniyat bor deb o‘ylayman», — deya Trampning so‘zlarini keltiradi Reuters.

Uning so‘zlariga ko‘ra, Rossiya va Ukraina o‘rtasida Istanbuldagi uchrashuvdan «yaxshi natijalar kutish mumkin» va u «potensialga ega». Trampning o‘zi shu hafta Saudiya Arabistoni, BAA va Qatarga tashrif buyuradi, deb eslatadi agentlik.

Rossiya prezidenti Vladimir Putin Yevropa davlatlari va AQShning 30 kunlik o‘t ochishni to‘xtatish to‘g‘risida e’lon qilish haqidagi chaqiriqlariga e’tibor bermay, 15 may kuni Ukraina bilan «oldindan hech qanday shartlarsiz» Turkiyada to‘g‘ridan to‘g‘ri muzokaralar o‘tkazishni taklif qildi. Zelenskiy Istanbulda Putin bilan bevosita muzokaralarga tayyor ekanligini aytdi. «Putinni payshanba kuni Turkiyada kutaman. Shaxsan o‘zim. Umid qilamanki, bu safar ruslar turli bahonalarni izlamaydi», — deb yozgan Zelenskiy. Kreml bu xabarga javob bermadi.