Putin gubernatorlar maoshini keskin oshirdi

Rossiya prezidenti Vladimir Putin gubernatorlarning maoshlari va mukofot pullarini oshirish to‘g‘risidagi farmonni imzoladi. Huquqiy axborotlar rasmiy portaliga joylashtirilgan hujjatga ko‘ra, endi ularning maoshi bosh vazir o‘rinbosarinikiga tenglashtiriladi.

Faridaily nashrining baholashicha, hozirda bosh vazir o‘rinbosarlari oyiga 1,2-1,3 million rubl maosh oladi (urush boshlanganidan keyin Putin o‘z farmoni bilan amaldorlarga daromadlari to‘g‘risidagi deklaratsiyani e’lon qilmaslikka ruxsat bergan, shu bois ularning aniq maoshi ma’lum emas).

Shu bilan birga, nashr manbalarining ma’lumotlariga ko‘ra, gubernatorlarning maoshlari «ancha» kam va 150-200 ming rublni tashkil etadi.

«Shunday qilib, 2026 yildan boshlab oblast rahbarlarining maoshi kamida 5-6 barobarga oshadi. Yuqori martabali federal amaldorlardan birining taxminicha, o‘sish ancha sezilarli bo‘ladi — taxminan 10 baravar», — deyiladi xabarda.

Rasmiy ma’lumotlarga ko‘ra, 2024 yilda Rossiyada o‘rtacha maosh 87,9 ming rublni tashkil etgan.

Avvalroq Rossiyada kurerlarning maoshi diplomli mutaxassislarnikidan ham yuqori ekani aniqlangan edi. SuperJob ish qidirish xizmati tomonidan o‘tkazilgan «Kurer indeksi» tadqiqotiga ko‘ra, 2025 yil mart oyida Moskvada kuryyerlar uchun o‘rtacha maosh 130 ming rublni tashkil etgan bo‘lsa, oliy ma’lumotli mutaxassislar uchun bu ko‘rsatkich 105 ming rublni tashkil etgan.