Trampga suiqasddan so‘ng boshlangan tergov xavfsizlik bo‘yicha jiddiy kamchiliklarni aniqladi

Donald Trampga suiqasd uyushtirilganidan so‘ng boshlangan ichki tergov AQSh sobiq prezidentini qo‘riqlash bilan bog‘liq jiddiy kamchiliklarni tasdiqladi, deb yozdi The Washington Post (WP) tergov bilan tanish bo‘lgan ikki yuqori martabali hukumat amaldoriga tayanib.

Ularning ma’lumotlariga ko‘ra, tergov davomida Maxfiy xizmat xodimlari mahalliy politsiyaga o‘q otilgan binoning tomini qo‘riqlash bo‘yicha ko‘rsatma bermagan. Bundan tashqari, Maxfiy xizmat xodimlari ehtimoliy tahdidlarni kuzatishi kerak bo‘lgan radio xonasi vaziyatni va tashqi perimetrni kuzatayotgan mahalliy politsiyadan real vaqt rejimida xabarlarni qabul qila olmagan. Mahalliy politsiya faqat bir nafar Maxfiy xizmat xodimiga otishmachi bo‘lib chiqqan shubhali shaxs haqida xabar bergan. Shunday qilib, ehtimoliy tahdid haqida ogohlantirish Maxfiy xizmat radiosi orqali keng tarqatilmagan.

Hukumat vakillarining aytishicha, tergov natijalari kelasi hafta e’lon qilinishi mumkin. Maxfiy xizmat direktori vazifasini bajaruvchi Ron Rou 12 sentabr kuni Senat Milliy xavfsizlik qo‘mitasi va Vakillar palatasi tergov guruhiga bo‘shliqlarni bartaraf etish uchun kuchaytirilgan xavfsizlik choralarini ko‘rishni buyurganini aytdi, dedi VP manbalaridan biri. Uning so‘zlariga ko‘ra, gap, xususan, AQSh prezidentligiga nomzodlarning omma oldida chiqishlari vaqtida Maxfiy xizmat va mahalliy politsiya xodimlarini bitta qo‘mondonlik markaziga joylashtirish haqida ketmoqda.

Trampga suiqasd 13 iyul kuni kechqurun Pensilvaniya shtatining Batler shahridagi saylovoldi tashviqoti mitingidagi chiqishi vaqtida sodir bo‘ldi. Politsiya ma’lumotlariga ko‘ra, oqibatda bir kishi halok bo‘lgan, ikki nafari og‘ir yaralangan. Federal qidiruv byurosining ma’lum qilishicha, suiqasdni 20 yoshli Tomas Metyu Kruks uyushtirgan, u otib o‘ldirilgan.

AQSh Maxfiy xizmat direktori Kimberli Chitl 22 iyul kuni Vakillar palatasining nazorat qo‘mitasida bergan ko‘rsatmasi paytida tanqidlar ostida qolib, iste’foga chiqdi. «Direktoringiz sifatida men xavfsizlik bo‘shlig‘i uchun to‘liq javobgarlikni o‘z zimmamga olaman», deb yozgan u Maxfiy xizmat xodimlariga yo‘llagan yakuniy maktubida.