Ukraina UYeFAning rossiyalik o‘smirlarga musobaqada qatnashishga ruxsat berganini qoraladi

Ukraina futbol assotsiatsiyasi (UAF) Yevropa futbol assotsiatsiyalari ittifoqining (UYeFA) 17 yoshgacha bo‘lgan futbolchilar o‘ynaydigan Rossiya milliy jamoalariga o‘z musobaqalarida ishtirok etishiga ruxsat berish haqidagi qarorini qoraladi. «Ishonchimiz komilki, Rossiya tomonidan Ukrainaga qarshi olib borilayotgan jangovar harakatlar sharoitida musobaqalarda ishtirok etish uchun Rossiyadan jamoalarni bosqichma-bosqich qaytarish bo‘yicha bunday qarorlarning qabul qilinishi asossiz va Rossiyaning agressiv siyosatiga e’tiborsizlikdan darak beradi», deyiladi 26 sentabr, seshanba kuni chop etilgan UAF bayonotida.

Ukraina tomoni UYeFA va Xalqaro futbol federatsiyasining (FIFA) har qanday Rossiya milliy jamoasining ushbu tashkilotlar shafeligidagi xalqaro musobaqalarda ishtirok etishiga yo‘l qo‘ymaslik haqidagi avvalgi qarorlarini saqlab qolishni talab qilmoqda. UAF Rossiya jamoalari ishtirokidagi musobaqalarda ishtirok etish niyatida emas va UYeFAga a’zo boshqa assotsiatsiyalarni Rossiya futbolchilari ishtirokidagi o‘yinlarni boykot qilishga chaqirdi. 

Angliya va Polsha Rossiya o‘smirlari bilan o‘yinlarga boykot e’lon qildi 

Ayni paytda, Angliyaning o‘smirlar milliy jamoasi xalqaro musobaqalarga yo‘l olgan rossiyalik tengdoshlari bilan o‘ynashdan bosh tortadi, deb yozadi Britaniyaning The Times gazetasi Angliya futbol assotsiatsiyasi vakiliga tayanib. «Biz Rossiyani UYeFA musobaqalariga qaytadan qabul qilish pozitsiyasini qo‘llab-quvvatlamaymiz va pozitsiyamiz o‘zgarishsiz qolmoqda: Angliya jamoalari Rossiyaga qarshi o‘ynamaydi», - deya assotsiatsiya vakilining so‘zlaridan iqtibos keltirgan nashr.  

Polsha futbol ittifoqi ham rossiyalik futbolchilar bilan o‘yinlarni boykot qilishga qaror qildi, deb yozadi Reuters tashkilotga tayanib. 

26 sentabr kuni UYeFA ijroiya qo‘mitasi Rossiyaning 17 yoshgacha bo‘lgan milliy jamoasiga joriy mavsumda xalqaro musobaqalarda ishtirok etishiga ruxsat berishga qaror qildi. «UYeFA bolalar faqat kattalar javobgar bo‘lgan harakatlar uchun jazolanmasligi kerakligini tan oladi va futbol hech qachon tinchlik va umid xabarlarini yuborishdan to‘xtamasligi kerakligiga qat’iy ishonadi», — deyiladi tashkilot xabarida. Shu bilan birga, Rossiya o‘smirlari ishtirokidagi o‘yinlar Rossiya bayrog‘i va madhiyasisiz o‘tkaziladi, deya qo‘shimcha qildi UYeFA.