Ўзбекистонга чет давлатдан пул ўтказмалари кибержиноятчилар ҳужумига учрамоқда

Ўзбекистонга чет давлатдан пул ўтказмалари кибержиноятчилар ҳужумига учраяпти. Ўтказма олувчи қўлига етиб келмасдан ғойиб бўлиб қолмоқда.  

Қашқадарёлик, айни пайтда Россияда ишлаётган Жамол Эшқобилов шундай вазиятга тушди. Kun.uz’га мурожаат йўллаган йигит жўнатган пулини бошқа шахслар ўзлаштириб олганини айтмоқда.

Жамол Эшқобиловга кўра, у 18 июл куни “Золотой корона” иловаси орқали турмуш ўртоғи номига 1200 АҚШ доллари миқдорида пул ўтказмасини амалга оширган.

“Турмуш ўртоғим банкка бориб, паспортини берган ва навбатда туриб кута бошлаган. Шу пайтда ёшроқ йигит келиб, турмуш ўртоғимнинг ёнида турган аёлдан қўнғироқ қилиб олиш учун телефонини сўраган. Телефонимнинг пули йўқ, деган жавобни олгач турмуш ўртоғимдан илтимос қилган. Аёлим телефонини берган ва у йигит четроққа ўтиб, ким биландир гаплашган. Сўнг телефонни қайтариб, раҳмат айтиб кетган.

Бироздан сўнг аёлимнинг телефонига яширин рақамдан қўнғироқ бўлган. Нотаниш шахс сиз фалончимисиз, сизга Россиядан 1200 доллар пул ўтказмаси келганми, дея савол берган. Турмуш ўртоғим “Сиз буни қаердан биласиз?”, дегач у одам телефонни ўчириб қўйган. Шу тариқа, аёлим навбати келиб, касса олдига борса, бу пул олинганини маълум қилишган”, дейди Жамол Эшқобилов.

Шундан сўнг мобил алоқа оператори филиалига бориб, қўнғироқ қилган яширин рақам аниқланган ва ИИБга мурожаат қилишган. Ҳозирда ҳолат ИИБ томонидан ўрганилмоқда.

Маълум бўлишича, “Золотой корона” иловасидан пул ўтказмаси амалга оширилганда доим пул олинган банк манзили кўрсатилган.

Бу сафар эса иловада пул телефон орқали олингани ҳақидаги маълумот пайдо бўлган.

Жамол Эшқобиловнинг айтишича, олдинроқ дўсти билан ҳам шу каби ҳолат содир бўлган. Фақат ўтказма суммаси кичикроқ бўлгани сабабли дўсти бу ҳақда ҳуқуқни муҳофаза қилгувчи органларга мурожаат қилмаган.