O‘zbekistonga chet davlatdan pul o‘tkazmalari kiberjinoyatchilar hujumiga uchramoqda

O‘zbekistonga chet davlatdan pul o‘tkazmalari kiberjinoyatchilar hujumiga uchrayapti. O‘tkazma oluvchi qo‘liga yetib kelmasdan g‘oyib bo‘lib qolmoqda.  

Qashqadaryolik, ayni paytda Rossiyada ishlayotgan Jamol Eshqobilov shunday vaziyatga tushdi. Kun.uz’ga murojaat yo‘llagan yigit jo‘natgan pulini boshqa shaxslar o‘zlashtirib olganini aytmoqda.

Jamol Eshqobilovga ko‘ra, u 18 iyul kuni “Zolotoy korona” ilovasi orqali turmush o‘rtog‘i nomiga 1200 AQSh dollari miqdorida pul o‘tkazmasini amalga oshirgan.

“Turmush o‘rtog‘im bankka borib, pasportini bergan va navbatda turib kuta boshlagan. Shu paytda yoshroq yigit kelib, turmush o‘rtog‘imning yonida turgan ayoldan qo‘ng‘iroq qilib olish uchun telefonini so‘ragan. Telefonimning puli yo‘q, degan javobni olgach turmush o‘rtog‘imdan iltimos qilgan. Ayolim telefonini bergan va u yigit chetroqqa o‘tib, kim bilandir gaplashgan. So‘ng telefonni qaytarib, rahmat aytib ketgan.

Birozdan so‘ng ayolimning telefoniga yashirin raqamdan qo‘ng‘iroq bo‘lgan. Notanish shaxs siz falonchimisiz, sizga Rossiyadan 1200 dollar pul o‘tkazmasi kelganmi, deya savol bergan. Turmush o‘rtog‘im “Siz buni qayerdan bilasiz?”, degach u odam telefonni o‘chirib qo‘ygan. Shu tariqa, ayolim navbati kelib, kassa oldiga borsa, bu pul olinganini ma’lum qilishgan”, deydi Jamol Eshqobilov.

Shundan so‘ng mobil aloqa operatori filialiga borib, qo‘ng‘iroq qilgan yashirin raqam aniqlangan va IIBga murojaat qilishgan. Hozirda holat IIB tomonidan o‘rganilmoqda.

Ma’lum bo‘lishicha, “Zolotoy korona” ilovasidan pul o‘tkazmasi amalga oshirilganda doim pul olingan bank manzili ko‘rsatilgan.

Bu safar esa ilovada pul telefon orqali olingani haqidagi ma’lumot paydo bo‘lgan.

Jamol Eshqobilovning aytishicha, oldinroq do‘sti bilan ham shu kabi holat sodir bo‘lgan. Faqat o‘tkazma summasi kichikroq bo‘lgani sababli do‘sti bu haqda huquqni muhofaza qilguvchi organlarga murojaat qilmagan.