Чегарасиз бизнес: Дубай ягона эркин зона паспортини жорий қилди

Дастур Дубайни дунёнинг энг чаққон ва инвесторлар учун қулай иқтисодиётга айлантириш стратегияси доирасида ишлаб чиқилган. Бундан ташқари, бу қадам билан амирликнинг 30 дан ортиқ эркин иқтисодий зоналарида ягона тартиб ўрнатиш, уларни технология, ОАВ ва логистика, инфратузилма билан интеграция қилиш ҳаракати тезлашади.

Ягона бизнес паспорти Дубайни тадбиркорлик ва инвестициялар учун энг яхши глобал шаҳарлар қаторига олиб кириши керак. Чунки битта паспорт билан компаниялар, хусусан катта брендлар бошқа зоналарда ҳам бемалол иш олиб боришига рухсат этилади. Эркин зоналар бош кенгаши котибиятига кўра, бу иқтисодий куч сифатида Дубайнинг халқаро мавқейини янада оширади.

"Дубай корхоналарга муаммосиз кенгайиш имкониятини тақдир этаркан, асосий инвестиция жойига айланади", дейди котибият. Франциянинг дунёга машҳур ҳашаматли мода бизнеси – Louis Vuitton биринчи бўлибоқ ушбу паспортни олди ва иккинчи саноат зонасида корпоратив офисини очиб улгурди.

Louis Vuitton’нинг янги офис очиши ва ишларни бошлашига атиги 5 кун сарфлагани жиддий эътиборни тортди. Бу билан Дубай бизнес очишда чаққонлигини ва ортиқча қоғозбозлик устидан ғалаба қозонганини фаол реклама қила олди.

Эркин зоналарни тартибга солиш бўйича идора вице-президенти Абдалла ал-Баннага кўра, Louis Vuitton’нинг JAFZA’да офисини очиши - Дубай жалб қилаётган бизнес калибри ва самарали ишбилармонлик муҳитини яратишга бўлган мажбуриятни исботлайди. Яъни бу билан энди Дубайдаги бизнес экотизимига бўлган халқаро ишонч янада юксалади.

Эслатиб ўтамиз, БААдаги эркин зоналар - 100%лик хорижий мулкчилик, солиқ имтиёзлари, божхона имтиёзлари ва автоном тартибга олиш базасини таклиф этадиган махсус иқтисодий ҳудудлардир. Ушбу зоналарда бизнесни содда юритиш учун мўлжалланган соғлиқни сақлаш, логистика, ОАВ тизими интеграциялашган.