Дубайда апрел ойидаги жанжал оқибатида икки ўзбекистонлик вафот этгани маълум бўлди

Дубайдаги ёқилғи қуйиш шохобчасида юз берган пичоқбозлик оқибатида Ўзбекистоннинг икки фуқароси ҳалок бўлди. Бу ҳақда Khaleej Times хабар берди.

Қайд қилинишича, ҳодиса апрел ойида юз берган. Жабрланувчилар автомобил шинасини шишириш учун шохобчага борганида жанжал юз берган. Бунга эски келишмовчилик сабаб бўлгани айтилмоқда.

Терговга кўра, икки гуруҳ алоҳида автомобилда шохобчага борган. Жабрланувчилардан бири автомобилидан тушиб, шиналарни текшираётган вақтида бир гуруҳ эркаклар ҳужумига учраган. Шунда иккинчи жабрланувчи қочишга уринган, бироқ кўп ўтмай бошқа бир гуруҳ томонидан ушланган. Пичоқбозлик икки нафар ўзбекистонликнинг ўлими билан якунланган.

Яқин атрофда хизмат олиб бораётган полиция ходими воқеа юзасидан зудлик билан тегишли идораларга хабар берган.

Ҳодиса жойига етиб келган Дубай полицияси видеокамералар орқали ҳамда гувоҳларнинг кўрсатмалари асосида ҳодиса тафсилотларини ва унда иштирок этган шахсларни аниқлаб олган.

Тезкор терговдан сўнг, полиция 11 нафар иштирокчини, шу жумладан асосий гумонланувчиларни қўлга олган. Уларнинг исми-шарифи хабарда келтирилмаган. Ҳибсга олинганлар сўроқ пайтида можарога алоқадор эканини тан олгани таъкидланмоқда.

Расмийлар берган изоҳга кўра, пичоқбозлик шахсий зиддиятдан келиб чиққан, унда бир-бирини яхши танийдиган одамлар иштирок этган. Мазкур ҳолат бўйича иш қонуний чора кўрилиши учун прокуратурага топширилган.

Апрел ойида ушбу жанжал видеоси тарқалган, ўшанда фақат бир киши ҳалок бўлгани хабар қилинганди. Бунинг ортидан Ўзбекистон ТИВ расмийси Аҳрор Бурҳонов Ўзбекистон фуқаролари томонидан содир этилаётган қонунбузарлик ҳолатлари кўпаяётгани икки давлат ўртасидаги визасиз тартибга таъсир кўрсатиши мумкинлигидан огоҳлантирганди.