Франциялик топ-менежер Москва билан бизнес юритяпти

Украинага етказиб бериладиган Mirage 2000 қирувчи самолётларини ишлаб чиқарувчи Франциянинг Dassault Aviation компанияси мустақил директори Анри Проло Россия Федерациясидаги компанияларга эгалик қилади ва Путинга яқин бўлган "АБР Менеджмент" директорлар кенгашига киради.

Фото: AP

Франция томонидан Украинага етказиб бериладиган Mirage 2000 қирувчи самолётларини ишлаб чиқарувчи Dassault Aviation француз аэрокосмик компаниясининг топ менежери Анри Проло Россияда ҳам бизнес билан шуғулланади. 18 июл, жума куни чоп этилган The Insider тадқиқотига кўра, Проло 2013 йилдан бери Россия президенти Владимир Путиннинг дўстларининг пулларини бошқарадиган "АБР Менеджмент" АЖ директорлар кенгаши аъзоси ҳисобланади.

"АБР Менеджмент" компанияси Путинга яқин ишбилармонлар Юрий Ковалчук ва Николай Шамалов иштирокида «Кремл пулларини», яъни уларнинг "Россия" банки, "СОГАЗ" суғурта компанияси ва Миллий медиа гуруҳига рўйхатдан ўтказилган активларини бошқариш учун яратилган», деб ёзади The Insider.

Анри Проло билан бир қаторда директорлар кенгаши таркибига Юрий Ковалчукнинг ўғли ва "Россия" банки бошқаруви раиси Михаил Клишин ҳам киради, уларнинг иккаласи ҳам 2016 йилдан бери АҚШ санкциялари остида бўлиб, Украинадаги уруш бошланганидан буён Европа Иттифоқи, Буюк Британия ва Канаданинг санкция рўйхатига киритилган.

76 ёшли Анри Проло Франция ҳукмрон элитасида таниқли шахсдир. У Франциянинг собиқ президенти Николя Саркози ва ҳозирги давлат раҳбари Эммануэл Макрон билан яхши таниш. 2009 йилдан 2014 йилгача Проло Électricité de France (EDF) давлат электр компаниясини бошқарган, бироқ коррупция гумонлари туфайли ишдан бўшатилган.

#Москва #менежер #бизнес