SpaceX Исроилга тегишли алоқа сунъий йўлдошини орбитага олиб чиқди

Dror-1 алоқа сунъий йўлдоши мамлакат ҳукуматининг буюртмасига кўра, «Исроил авиация саноати» мудофаа концерни томонидан ишлаб чиқилган.

Фото: SpaceX

Американинг Falcon 9 ракетаси 13 июл куни Исроилнинг Dror-1 алоқа сунъий йўлдошини орбитага олиб чиқди.

Қайд этилишича, ракета Флориданинг Канаверал бурнидаги Америка Космик кучларига қарашли 40-старт мажмуасидан учирилган.

Dror-1 алоқа сунъий йўлдоши мамлакат ҳукуматининг буюртмасига кўра, «Исроил авиация саноати» мудофаа концерни томонидан ишлаб чиқилган. Қиймати салкам 200 миллион доллар турадиган аппарат 15 йил хизмат қилиши режалаштирилган.

Парвоз вақтида Falcon 9’нинг 13-маротаба фойдаланилган кўп марталик биринчи поғонаси Атлантика океанидаги Just Read the Instructions денгиз платформасига бошқарилувчан вертикал қўнишни амалга оширди.

Эслатиб ўтамиз, январ ойида SpaceX БААга тегишли сунъий йўлдошни орбитага учирганди. Thuraya 4 сунъий йўлдоши Европа, Яқин Шарқ ва Африкада мобил алоқани тақдим этишга мўлжалланган.

#сунъий йўлдош #Falcon 9