Тошкентда йигит гинеколог шифокор номига сохта профил очиб, аёлларга пулли маслаҳат бериб келгани аниқланди

Тошкентда сохта профил орқали ўзини гинеколог шифокор сифатида танитиб келган йигит маъмурий жазога тортилди.

Kun.uz танишган суд қарорида келтирилишича, 1996 йилда туғилган Б.Ш. 2025 йил июн ойи охирларида Telegram’да гинеколог шифокор Д.Сайдумарова номидан сохта профил очган. У бунда шифокорнинг сурати ва исмидан фойдаланган ҳамда одамларга ўзини Д.Сайдумарова сифатида таништирган. Сўнгра шу сохта профил орқали беморларга нотўғри маслаҳатлар бериб келган.

Б.С. судда айбига иқрорлик билдирган. У ҳақиқатан ҳам Д.Сайдумарованинг қадр-қимматининг камситилишига олиб келадиган ёлғон ахборот тарқатганини, аёлларга аёл гинеколог сифатида маслаҳатлар берганини тан олган. Б.С. қилган қилмишидан пушаймонлик билдириб, суддан енгиллик сўраган.

Жабрланувчи Д.Сайдумарова эса унинг номидан сохта профил очган Б.Ш. беморларга гинекология соҳасига умуман тўғри келмайдиган нотўғри маълумотлар тарқатганини, бу учун пул олганини маълум қилган. Б.Ш.нинг ҳаракати қадр-қимматининг камситилишига ва обрўсизлантирилишига олиб келганини айтган шифокор йигитга нисбатан қонуний чора кўришни сўраган.

Суд қарори билан Б.С. МЖтКнинг 202-2-моддаси 1-қисмида назарда тутилган ҳуқуқбузарликни содир этган деб топилган. Унга БҲМнинг 50 баравари, яъни 18 млн 750 минг сўм миқдорида жарима жазоси тайинланган.