Хитой Путиндан НАТОга ҳужум қилишни сўрайди — алянс бош котиби

Хитой АҚШ эътиборини Ҳинд-Тинч океани минтақасидан чалғитиб, Тайванни эгаллаб олишга уриниш мақсадида, Россияни НАТОга қарши гижгижлаши мумкин. Бу ҳақда альянс бош котиби Марк Рютте The New York Times’га берган интервюсида маълум қилди.

«Келинглар, гўл бўлмайдилик: агар Си Жинпинг Тайванга ҳужум қилишга қарорига келса, у дастлаб ушбу масалада ўзининг кичик шериги, Москвада яшайдиган Владимир Владимирович Путинга қўнғироқ қилади ва унга шундай дейди: «Қара, мен буни амалга оширмоқчиман ва сен НАТО ҳудудига ҳужум қилиб, эътиборни Европага жалб қилишинг керак».

Унинг фикрича, бундай сценарий эҳтимоллиги ошиб бормоқда, хусусан, у «5-7 йилдан кейин» юз бериши мумкин. Бунга йўл қўймаслик учун эса алянс аъзолари икки ишни бажариши керак: «руслар ҳеч қачон бундай қадамни ташлашга журъат қила олмайдиган даражада» кучли бўлиши, шунингдек, мудофаа саноати ҳамда инновация соҳасида Ҳинд-Тинч океани минтақаси билан фаолроқ ҳамкорлик қилиши лозим.

«Қаршимизда улкан геосиёсий таҳдид турибди. Энг аввало, бу — Россия, у ҳарбий қудратини замонавий тарихда мисли кўрилмаган суръатда оширмоқда. Ҳозирда у уч ой ичида НАТО давлатлари бир йилда ишлаб чиқарганидан уч баравар кўпроқ ўқ-дорилари ишлаб чиқармоқда», — дейди Рютте. У Россия Украинага қарши уруш олиб бориш билан бирга, Шимолий Корея, Хитой ва Эрон билан ҳамкорлик қилаётганини эслатиб ўтди.

Рютте яна бир бор мудофаа харажатларини ЯИМнинг 5 фоизигача ошириш кераклигини таъкидлади. Унинг сўзларига кўра, ҳозирги геосиёсий вазиятда алянс эски 2 фоизли даража билан ўзини ҳимоя қила олмайди.

Унинг қўшимча қилишича, ҳозир НАТО олдидаги энг катта муаммо — бу ҳарбий ишлаб чиқаришдир. «Бизда Россия, Шимолий Корея ёки бошқа ҳар қандай таҳдид солувчи давлатни тийиб туриш учун зарур бўлган қуролларни ишлаб чиқарадиган мудофаа саноати йўқ. Ҳозир биз бунинг устида жуда тезкор суръатларда ишлаяпмиз», — дейди алянс бош котиби.