Ҳиндистон ШҲТ қўшма декларациясини имзолашдан бош тортди

Ҳиндистон Шанҳай ҳамкорлик ташкилоти (ШҲТ) йиғилишининг қўшма декларациясини имзолашдан бош тортди, унда жорий йилнинг апрел ойида Паҳалгам ҳужуми ҳақида ҳеч нарса дейилмаган.

Ҳиндистон мудофаа вазири Ражнатх Сингх Хитойнинг Циндао шаҳрида бўлиб ўтган ШҲТга аъзо давлатлар мудофаа вазирлари йиғилишида иштирок этди, деб хабар берди NDTV.

Сингхнинг айтишича, апрел ойида Жамму-Кашмирдаги ҳужум декларацияга киритилмаган ва улар «икки томонлама стандартларга қарши чиқади».

«Бундай икки томонлама стандартларга ўрин бўлмаслиги керак. ШҲТ бундай давлатларни танқид қилишдан тортинмаслиги керак», — деди Сингх учрашув якунлари бўйича қўшма баёнотни имзолашдан бош тортиб.

Сингх қўшма баёнотни «покистонпараст» деб атади, деди исми ошкор этилмаган манба Associated Press (AP) агентлигига.

Декларация «Ҳиндистоннинг терроризм ва минтақавий хавфсизлик каби муҳим масалалардаги позициясини заифлаштирганини» иддао қилган Сингх унда Покистоннинг Балужистон минтақасидаги «жангарилар фаолияти» тилга олинган ва «Покистон позицияси ҳимояси давом эттирилган» деди.

Сингх Покистон номини тўғридан тўғри айтмаган ҳолда, ШҲТни «трансчегаравий терроризмдан сиёсат қуроли сифатида фойдаланаётган ва террорчиларни ўз ичига олувчи» давлатларни танқид қилишга чақирди.