Пропаннинг биржа нархи ой бошидан бери 31 фоизга ошди

30 май куни 1 тонна пропаннинг биржадаги ўртача нархи 5,1 млн сўм бўлган бўлса, 24 июнга келиб ўртача нарх 6,6 млн сўмгача қимматлашиб кетди.

Фото: Яндекс-хариталар

Ўзбекистонда суюлтирилган газнинг улгуржи нархи июн ойи бошидан бери 30,6 фоизга қимматлашди.

Товар-хомашё биржаси маълумотларига кўра, 30 май кунги савдоларда пропаннинг ўртача нархи тоннасига 5 млн 120 минг сўмни ташкил этган. 24 июнга келиб, ўртача нарх 6 млн 689 минг сўмга етган.

Хусусан, бу товар сўнгги икки кунлик савдоларда 6,6 фоизга қимматлашди. 24 июн куни сотилган пропан ҳажми бир кун олдинги 1853 тоннадан 1502 тоннагача камайди.

Пропаннинг кескин қимматлаши ўтган йили ёзда ҳам кузатилган эди. Kun.uz 2024 йил 5 июндан 5 сентябргача бўлган даврда пропаннинг биржа нархи тоннасига 5,3 млн сўмдан 8,9 млн сўмгача ёки 68 фоизга ошганини ёзганди.

“Қани депутатлар, нега қарамаяпти?” — пропан нархидан ҳайдовчилар хавотирда

Ноябр ойига бориб, сўнгги 5 ойлик қимматлашиш суръати қарийб 2 баробарга етгач, Рақобат қўмитаси биржага чиқарилаётган пропаннинг бошланғич нархига нисбатан 20 фоизлик спред (чеклов) ўрнатган эди.

#пропан #энергетика