«Трамп аралашмагунча бизда муаммо йўқ эди». Калифорния губернатори Лос-Анжелесдан ҳарбийларни чақириб олишни талаб қилди

Калифорния губернатори Гэвин Нюсом тартибсизликлар туфайли АҚШ президенти Доналд Трамп томонидан қабул қилинган Миллий гвардия бўлинмаларини Лос-Анжелесга юбориш тўғрисидаги қарорни расман бекор қилишни талаб қилди.

9 июнга ўтар кечаси Нюсом Х ижтимоий тармоғида Пентагон раҳбари Пит Ҳегсетга мурожаати нусхасини эълон қилди, унда у, хусусан, агар вазият ташқи кучлар босқини ёки давлат ҳокимиятига таҳдид соладиган тартибсизликларга тааллуқли бўлмаса, фақат штат губернатори федерал ҳокимиятга Миллий гвардияни киритиш сўрови билан мурожаат қилиши мумкинлигини айтган.

Калифорния губернатори Миллий гвардия бўлинмаларининг Лос-Анжелесга киритилиши «вазиятни жиддий кескинлаштириши» мумкинлигини таъкидлаган ва бу бекор қилинишини талаб қилган.

«Трамп аралашмагунча бизда муаммо йўқ эди. Бу штат суверенитетининг жиддий бузилиши – кескинликни қўзғатиш ва ресурслар аслида керак бўлган жойдан чиқиб кетиши», – дея қайд этган Нюсом.

MSNBC телеканалига берган интервюсида Нюсом Калифорния расмийлари душанба куни Лос-Анжелесда Миллий гвардиянинг киритилишига судда эътироз билдиришини айтди. Трампнинг бу қарорини Нюсом «ноқонуний, ахлоқсиз ва конституцияга зид» деб атади, деб ёзади CNN. Губернатор бу қарор вазиятни нормаллаштиришга ёрдам бермай, фақат «оловга мой қуйиши»ни таъкидлаган.

Лос-Анжелес жанубидаги Парамоунт шаҳрида 6 июн куни кечқурун мигрантларга қарши рейдлардан сўнг тартибсизликлар бошланди, натижада ўнлаб одамлар қўлга олинди. Рейдларга қарши намойишчилар ва ҳуқуқ-тартибот идоралари ходимлари ўртасида тўқнашувлар содир бўлган. Тартибсизликлар 7 июн куни ҳам давом этди. Намойишчилар чегара патрули машиналарига тош улоқтирган. Бунга жавобан ҳуқуқ-тартибот идоралари ходимлари резина ўқлардан фойдаланган. Трамп Лос-Анжелесга Миллий гвардиянинг икки минг нафар аскарини юбораётганини маълум қилди. АҚШ президенти маъмурияти ноқонуний муҳожирларга қарши кураш билан шуғулланган ҳуқуқ-тартибот идоралари ходимларига ҳужум қилишга йўл қўйиб бўлмаслигини таъкидлади. Калифорния губернатори эса зўравонлик ишлатмасликка чақирди ва штат ҳуқуқ-тартибот идоралари вазиятни ўзлари ҳал қила олишини таъкидлади.