ОАВ: Илон Маск Оқ уйда молия вазири билан ёқалашиб кетган

The Washington Post газетаси Маскнинг молия вазири Скотт Бесcент билан тўқнашуви ҳақида ёзди, тадбиркор унинг «кўкрак қафасига елкаси билан зарба берган». Ижтимоий тармоқ фойдаланувчилари унинг ўнг кўзи атрофи кўкарганини шу жанжал билан боғламоқда.

АҚШ президентининг собиқ маслаҳатчиси Стив Бэннон апрел ойида Оқ уйда миллиардер Илон Маск ва молия вазири Скотт Бессент ўртасидаги оғзаки тортишувдан сўнг ўртада жанжал келиб чиққанини маълум қилди.

Овал кабинетдан чиқишдаги йўлакда давом этган баҳс пайтида Бессент Маскка шундай деган: «Сен фирибгарсан. Ғирт фирибгар».

Шунда Маск регби ўйинчиси каби Бессентнинг кўкрак қафасига елкаси билан зарба беради, Бессент эса унга жавоб қайтаради, дейди Бэннон. Унинг сўзларига кўра, бир неча киши уларни ажратиш учун аралашган ва кейин Маск Оқ уйнинг Ғарбий қанотидан «чиқариб юборилган»

Доналд Трамп муштлашув ҳақида эшитиб, «Бу энди ҳаддан ошиш», деганди, дея қўшимча қилади Бэннон.

Ўша пайтда Ҳукумат самарадорлик департаменти (DOGE) раҳбари лавозимида ишлаган Маск ва Бессент ўртасидаги жанжал ҳақида аввалроқ Axios нашри ҳам ёзганди, унга кўра, тадбиркор ва амалдор бир-бирини ҳақорат қилган. Жанжалга Солиқ хизматини ким бошқариши ҳақидаги келишмовчилик сабаб бўлган. Трамп Маск лобби қилган Гэри Шеплини солиқ хизмати раҳбари вазифасини бажарувчи этиб тайинлаган, Бессент эса бу лавозимда молия вазири ўринбосари Майкл Фолкендерни кўришни хоҳлаганди ва Маск уни айланиб ўтган ҳолда ҳаракат қилаётганидан ғазабланган.

Май ойи охирида Маск давлат хизматидан ва Ҳукумат самарадорлиги департаменти раҳбарлигидан кетишини эълон қилди ва бир неча кундан сўнг Доналд Трампнинг солиқ имтиёзлари ва бюджетни узайтириш тўғрисидаги «катта чиройли қонуни»ни танқид қилиб, уни «жирканч бузуқлик» деб атади.

5 июн куни Маск ва Трамп ўртасидаги муносабатларда кескинлик кучайди: тадбиркор Трамп «Эпштейн файллари» деб аталадиган ҳужжатларда мавжудлиги ҳақида ёзди, шунингдек, у ўз ёрдами билан АҚШ президенти сайловларда ғалаба қозонгани, республикачилар Конгресс Вакиллар палатасида унинг ёрдами туфайли устунликка эришганини эслатди. Трамп эса ўз навбатида Маскнинг компаниясини давлат субсидияларидан маҳрум этиш билан таҳдид қилди.

Икки кундан кейин Маск «Эпштейн файллари» ҳақидаги постни ўчириб ташлади. Трамп, ўз навбатида, журналистларга Маск билан суҳбатдан «манфаатдор эмаслиги»ни айтди. The Washington Post нашрининг ёзишича, президент атрофдагиларни «оловга мой сепмаслик»ка чақирган, вице-президент Жей Ди Вэнсга эса Маск билан боғлиқ вазият бўйича оммавий чиқишларида «эҳтиёт бўлиш»ни маслаҳат берган.

#Илон Маск