Илон Маск АҚШ президенти билан зиддият ортидан янги партия тузишни таклиф қилди

Маскнинг таъкидлашича, янги партия «америкаликларнинг 80 фоизини марказчи қарашларини» ифодалаши мумкин.

Фото: Cbsnews

Америкалик тадбиркор ва Tesla ва SpaceX компаниялари эгаси Илон Маск Қўшма Штатларда янги сиёсий куч — «Америка партияси»ни ташкил қилиш ниятида эканини айтди.

Бу ҳақда миллиардер X ижтимоий тармоғида АҚШ президенти Доналд Трамп билан келишмовчиликлар ортидан маълум қилди.

Маскнинг таъкидлашича, янги партия «америкаликларнинг 80 фоизини марказчи қарашларини» ифодалаши мумкин.

«Қўшма Штатларда 80 фоиз мўътадил кўпчиликни ҳақиқий ифодаловчи сиёсий партия яратиш вақти келдими?», деб сўради у обуначилардан.

Маск томонидан ўтказилган онлайн сўров шуни кўрсатдики, иштирокчиларнинг 80,4 фоизи янги сиёсий куч яратиш ғоясини қўллаб-қувватлаган, 19,6 фоизи эса қарши чиққан.

«Халқ ўз фикрини айтди. Қўшма Штатларга мўътадил кўпчиликни ифодаловчи янги партия керак. 80 фоиз одам бунга рози. Бу тақдир», деб ёзди Маск овоз бериш натижаларини шарҳлар экан.

Аввалроқ, Маск Трамп ваъда қилган солиқ имтиёзларини амалга оширишга қаратилган қонунини танқид қилганди. Бунга жавобан Трамп уни ақлдан озганликда айблади. Шундан сўнг, иккаласи ўртасида ўзаро айбловлар билан оммавий можаро келиб чиқди.

#АҚШ #Илон Маск #Америка партияси