Ўзбекистонда модернизация қилинган Т-64 танки намойиш этилди

Танкнинг базавий Т-64Б совет танкидан асосий фарқи янги композит зирҳ ва 950 от кучига эга Doosan DP222LC двигатели экани таъкидланмоқда.

Ўзбекистонда ўтказилган MSITF-2025 мудофаа технологиялари фестивалида Т-64Б совет танкининг модернизация қилинган версияси намойиш этилди. Бу ҳақда Россиянинг «Стратегия ва технологияларни таҳлил қилиш маркази» хабар берди.

Марказ фикрига кўра, танк Жанубий Корея компаниялари кўмагида модернизация қилинган бўлиши мумкин. Танкнинг базавий Т-64Б танкидан асосий фарқи янги композит зирҳ ва 950 от кучига эга Doosan DP222LC двигатели экани таъкидланмоқда.

Янги двигател аввалги 700 от кучига эга 5ТДФ двигатели ўрнига ўрнатилган. Танк шунингдек, автоматик трансмиссияни ҳам олди. Оғирлиги 40 тонна бўлган машина 65 км/с тезликда ҳаракатланади.

Асосий Т-64Б совет танки 1976 йилдан бошлаб ишлаб чиқарилган. Машина 125 мм калибрли 2А46М-2 силлиқ найли пушка ва пулемётлар билан қуролланган. Танкнинг ҳимояси пўлат ва шиша толали кўп қатламли зирҳ билан таъминланади.

#Россия #Танк #қуролсозлик