Microsoft 6 минг ходимини ишдан бўшатганидан кейин юзлаб ишчиларини қисқартирди

Сўнгги ишдан бўшатишлар май ойидаги қисқартиришларнинг давоми ҳисобланади. Қисқартиришлар асосан дастурчи муҳандисларга таъсир қилмоқда.

Фото: Getty images

Microsoft корпорацияси сўнгги йиллардаги энг йирик ишдан бўшатишлардан бир неча ҳафта ўтиб, яна 300 нафардан ортиқ ходимини қисқартирди, деб хабар беради Bloomberg.

Microsoft вакилининг маълум қилишича, сўнгги ишдан бўшатишлар май ойида эълон қилинган 6 минг иш ўрнини қисқартиришга қўшимча ҳисобланади. «Биз компаниямизни ўзгарувчан бозор шароитида муваффақиятли фаолият юритиши учун ташкилий ўзгаришларни амалга оширишда давом этамиз», — дейди агентлик суҳбатдоши.

Қайд этилишича, сунъий интеллектнинг ривожланиши технологиялар соҳасида меҳнат бозорини ҳаракатга келтирган — компаниялар СИга боғлиқ иш ўринларига устуворлик бериб, ушбу технологиядан маблағларни тежашда фойдаланмоқда.

Microsoft сунъий интеллект ёрдамида дастурий таъминотни ишлаб чиқиш жараёнини тезлаштириш учун код ёзиш воситалари самарадорлигига таянаётган компаниялардан биридир. Аввалги қисқартиришлар эса энг кўп дастурчи муҳандисларга таъсир қилган.

2024 йил июн ҳолатига кўра, компанияда 228 мингга яқин ходим фаолият юритган, уларнинг 55 минги АҚШда ишлайди.

#Microsoft #сунъий интеллект