Хитой армиясининг собиқ раҳбарларидан бири Сюй Цилян вафот этди

У 10 йил давомида Марказий ҳарбий кенгаш раиси ўринбосари сифатида фаолият юритган. Кенгаш раиси эса ХХР етакчиси Си Жинпинг ҳисобланади.

Фото: AFP/Getty Images

Пекинда ХХР Ҳарбий-ҳаво кучлари генерали Сюй Цилян 75 ёшида вафот этди, деб хабар беради Xinhua агентлиги.

У 2012 йилдан 2022 йилга қадар Марказий ҳарбий кенгаш раиси ўринбосари лавозимида фаолият юритган, яъни Хитой Халқ-озодлик армиясидаги олий раҳбарлардан бири ҳисобланган.

Ғарб ОАВнинг ёзишича, Сюй Цилян ХХР раиси Си Жинпингга анча яқин бўлган. Марказий ҳарбий кенгаш — мамлакат армиясининг юқори бошқарув органи бўлиб, Хитой раиси унинг раҳбари ҳисобланади. Сюй Цилян ўн йил давомида унинг икки ўринбосаридан бири сифатида хизмат қилган.

Маълумотларга кўра, генерал Хитой раҳбариятига таъсир ўтказа олган. Сюй Цилян армия сафида 1966 йилдан бери хизмат қилиб келган, дастлаб, ХХРнинг еттита ҳарбий округидан бирига қўмондон бўлган, Шимолий қўмондонликни бошқарган ва Ҳарбий-ҳаво кучлари қўмондони лавозимида ҳам ишлаган.

#Хитой #Сюй Цилян