Қизалоқ ва Лучо: бир муҳаббат тарихи

Бугун 31 май. Тун ярмидан оққанда Мюнҳенда инсоният тарихидаги энг зўр спорт мусобақаси – Европа Чемпионлар Лигаси финали бошланади. Биз тенги йигитлар учун бу мусобақа ўзгача қадрли. Ахир энди-энди футболга қизиқа бошлаган вақтимизда турнир янгича форматга ўтиб дунёдаги энг зўр мусобақага айланаётганди-да.

{Yii::t(}

Ўтказиб юбориш 6s

Ўтказиб юбориш

ЕЧЛнинг афсонавий мусиқаси янграганда Тедди Шерингҳэмнинг ёш болаларча голни нишонлаб югургани, ҳал қилувчи пеналтини қайтарган Оливер Каннинг важоҳат билан бақиргани-ю, Зиданнинг такрорлаб бўлмайдиган голини кечагидай эслаймиз.

У вақтлар «свет» кўп ўчарди, интернет замони ҳам бошланмаган, финалларни доим кимнингдир уйида ёки кўчада аккумулаторми, «движок»ми ёқиб, тўпланиб кўрардик. Шу боис бу ажойиб мусобақа финалларининг ҳар бир лаҳзасини энтикиб эслаймиз.

Шунча йил ўтди ҳамки Чемпионлар Лигаси финали бўладиган кун яна биз футбол мухлисларининг юраги тез уришни бошлайди, кимга мухлислик қилишимиздан қатъи назар. Чунки бугун қайсидир жамоа футбол тахтига ўтиради, камида бир йилга…

Бугунги финални томоша қилиш учун яна бир сабаб борки, мен мана шу ҳақда ҳикоя қилиб бермоқчиман.

Ғалабага энг муносиб ота

Бугунги финалда ПСЖ ва «Интер» тўқнаш келади. Ҳа, бу мавсумда «Барселона», «Арсенал» ёки «Реал» зўр ўйин кўрсатган, финалга лойиқдек кўрингандир, лекин ишонинг, айнан Европанинг бугунги кундаги энг муносиб икки жамоаси финалга етиб келди. «Интер» ҳатто финал йўлида «Барса»ни енгиш учун А серияга жиддий эътибор қилолмай, скудеттони «Наполи»га бой берди. ПСЖ эса йўлидан чиққан барча инглиз жамоаларини «ямламай ютди», ҳатто ютиб бўлмайдигандек кўринган «Ливерпул»ни ҳам.

Парижликлар финалга Месси, Неймар, Мбаппе каби мегаюлдузларнинг жавобини берганидан кейин етиб келгани қанчалик рамзий, а? Худди футолнинг ўзи унда номларнинг аҳамияти йўқлигини кўрсатиб қўйгандек. Энди Парижда бошқа юлдуз бор – Луис Энрике. Лучо Европанинг энг зўр мураббийларидан бири эканини «Барселона»да вақтидаёқ исботлаб бўлган. Лекин ўшандан кейин мураббий жиддий синовга дуч келгандики, уни енгиб ўтиш ҳамманинг ҳам қўлидан келмайди.

Бугунги финал испаниялик мураббий учун айниқса аҳамиятли. 2015 йил Луис Энрике «Барселона» билан Чемпионлар Лигасини ютади. Берлиндаги финалдан кейин дунёда Энрикедан бахтли одам йўқ эди. У 6 ёшли қизалоғи Хана билан ғалабани нишонлаб суратга тушади. Қизалоқ «Барселона» байроғини ушлаб тушган суратни ҳамма кўрган бўлса керак.

Бироқ ўша бахтли онлардан 4 йил ўтиб Энрикенинг оиласи жиддий синов билан юзлашади. 9 ёшли Ханада саратон аниқланади. Суяк саратони болаларда кам учрайдиган касаллик эди, шу сабаб оила касаллик ҳақида жуда кеч хабар топади. Ўшангача ҳеч қандай аломат ҳам сезилмаганди.

Луис қизига қўйилган ташхисдан Малтада хабар топади. У Испания миллий жамоаси билан Европа чемпионати саралаши ўйинига тайёрланаётганди. Мураббий тезда Барселонага йўл олади. Кўп ўтмай Луис Испания миллий жамоасидан кетади, чунки қизи оғир касалга чалингани учун футболга эътибор беролмасди. Кейинги ярим йилни Энрике ва оиласи касалхона коридорларида ўтказади, мураббий озиб кетади.

Қизалоқ беш ой давомида касаллик билан курашади, лекин 2019 йил 29 август куни вафот этади. Бу ҳақда Энрикенинг ўзи хабар беради. «Қизалоғимиз Хана оғир касаллик билан беш ой курашганидан сўнг бизни тарк этди. Касалхонадаги шифокорлар, ҳамширалар, бизга ёрдам берган ҳаммага раҳмат деймиз. Хана, сени соғинамиз, қизим. Сен билан ўтган ҳар бир кунимизни эслаб юрамиз, сен оиламиз учун йўлчи юлдуз бўласан, руҳинг ором олсин, Ханита», деб ёзади Энрике.

Луис 4 йил ўтибгина қизини йўқотгандаги ҳиссиётларини бўлишади. Испания телеканали у ҳақда ҳужжатли филм суратга олади. «Биласизми, мен ўзимни бахтли одам деб ҳисоблайман. Чунки Ханита билан 9 йил ажойиб дамларни ўтказдик. У билан ўтган ҳар бир лаҳзани эслайман, куламан. Уни эслатадиган хотиралар, видеолар бор.

Бир куни ота-онамнинг уйларига бордим. Қарасам, уйда Хананинг бирорта сурати йўқ. «Она, нега унинг суратини қўймагансиз?», дедим. Онам «Бардош беролмайман, болам», деди. Мен эса «Онажон, у жисман бизни тарк этгани билан руҳан доим ёнимизда», дедим. Кейин уйга Хананинг суратини илиб қўйдик», деганди филмда Энрике.

Қайтиш

2019 йил ноябрда Испания миллий жамоасига қайтган Энрике у ерда ўзи хоҳлагандек ишлолмайди. Жамоа Европа чемпионати ва мундиалда муваффақиятсиз қатнашади. Бу вақтда Луис Энрикенинг саломатлиги ҳам ёмонлашганди. 2023 йил мураббий яна клубдаги мураббийликка қайтади.

Лучо жаҳон юлдузларини олиб келиб ҳам Чемпионлар Лигасини ютолмаётган ПСЖни қабул қилиб олади. Бу катта таваккал эди, чунки клубда ички муаммолар мавжуд, Мбаппе «чемодан кайфиятида» ўйнаётганди.

Биринчи мавсумида Энрике клуб раҳбариятидаги жамоадан устун турадиган юлдузлар керак эмаслигини аниқ қилиб тушунтиради. Мбаппе баъзи ўйинларда захирада қолиб, баъзан ўйин тугамай захирага олинарди. Кейинги мавсум ҳам Луис учун қийин бошланади. Лекин кейинчалик ПСЖ олдидан чиққан барчани енгишни бошлади, Усмон Дембеле Европанинг энг яхши футболчиларидан бирига айланди. Жамоа ким учундир эмас, ПСЖ учун ўйнашни бошлайди. Бунинг номини эса мураббий жамоаси дейишади.

Шу тариқа Париж ҳақли тарзда Чемпионлар Лигаси финалига чиқди. Бу биринчи финал эмас, албатта: Мбаппе ва Неймар аввал ҳам финалга чиққанди, лекин ўшанда «Бавария» яққол фаворит эди. Энди ПСЖ клуб тарихида илк марта фаворит сифатида ЕЧЛ финалида ўйнайди.

«Байроқни яна бир бор кўтаришни истайман»

Луис Энрике учун бу финал ўзгача. «Арсенал» билан ўйиндан кейин мураббий 2015 йилдаги финални ёдга олди. «Ўшанда қизим «Барселона» байроғини кўтариб югургани эсимдан чиқмайди. ПСЖ билан ғолиб бўлсак, яна байроқни кўтариб расм тушмоқчиман. Тўғри, финалда у жисмонан биз билан бўлмайди, лекин руҳан доим ёнимизда. Бу мен учун жуда муҳим», деганди мураббий.

Бугунги финалда муносиб жамоа ғолиб бўлсин, спорт шуниси билан гўзал. Лекин мен бугун Луис Энрикега омад тилайман. Олға, Лучо! Сен Ханита учун ҳам бу шалпангқулоқ кубокни ютишинг ва байроқни кўтаришинг керак...

Ўткир Жалолхонов тайёрлади
Тасвирчи ва монтаж устаси – Фахриддин Ҳотамов