28 май янгиликлари: Ўзбекистонда рўй берган муҳим воқеа ва ҳодисалар

Ўзбекистон ва Италия стратегик шериклик муносабатларини мустаҳкамлайди, Malibu учун шартномалар бир соатга қолмай тугади, энди ногиронлик пенсиялари проактив шаклда тайинланади — ўтган кун давомида Kun.uzʼда ёритилган долзарб ва муҳим Ўзбекистон янгиликлари билан таништирамиз.

{Yii::t(}

Ўтказиб юбориш 6s

Ўтказиб юбориш

Самарқанддаги кўчага Рим шаҳри номи берилди

Самарқандда Жоржа Мелонининг ташрифи доирасида Ўзбекистон–Италия музокаралари бўлиб ўтди.

Унда икки томонлама стратегик шериклик муносабатларини янада ривожлантириш ва кўп қиррали ҳамкорликни кенгайтириш масалалари кўриб чиқилди. Томонлар фаол сиёсий алмашинувни давом эттиришни қўллаб-қувватлади.

Шунингдек, савдо соҳасида бизнесга техник кўмак дастурларини кенгайтиришга келишиб олинди.

Ўз навбатида Шавкат Мирзиёев Италиянинг етакчи компаниялари билан Технологик шериклик дастурини ишга туширишни таклиф қилди. Янги лойиҳаларни илгари суриш мақсадида Ҳукуматлараро гуруҳ ишини қайта тиклаш ва унинг йиғилишини бизнес форуми билан бирга ўтказишга келишиб олинди.

Учрашув якунида эришилган келишувларни амалга ошириш бўйича комплекс «йўл харитаси«ни тайёрлаш тўғрисида қарор қабул қилинди.

Музокаралар сўнгида Шавкат Мирзиёев ва Жоржа Мелони Стратегик шериклик муносабатларини мустаҳкамлаш тўғрисидаги қўшма декларацияни қабул қилди. Улар ҳузурида ташриф доирасида имзоланган битимларни алмашиш маросими ҳам ўтказилди.

Олий даражадаги Ўзбекистон–Италия музокаралари якунида халқаро Конгресс-марказида Самарқанд шаҳридаги кўчага Рим шаҳри номини беришга бағишланган тантанали маросим ўтказилди.

Шавкат Мирзиёев ушбу қарор чуқур тарихий ва маданий алоқалар, стратегик шериклик муносабатларининг ҳозирги юксак даражасини инобатга олган ҳолда, шунингдек, Ўзбекистон ва Италия халқлари ўртасидаги дўстлик ва ўзаро ҳурмат рамзи сифатида қабул қилинганини таъкидлади.

Бир соатга қолмай Malibu шартномалари тугади

UzAuto Motors компанияси 29 май куни соат 14:40 да Chevrolet Malibu XL автомобили учун контрактация қайта бошланганини маълум қилди.

Компания бугундан бошлаб ҳар бир мижоз автомобилни ўзига ёққан рангда, керакли модификациясида танлаш имконига эгалигини хабар қилди.

Лекин орадан бир соат ҳам ўтмай, соат 15:22 да барча шартномалар якунлангани маълум қилинди.

Аслида эса соат 14:58 ҳолатида ҳам Uzavtosavdo.uz сайтида Malibu XL автомобили учун шартнома олиш имконияти бўлмаган.

UzAuto Motors компанияси Malibu сотувини апрел ой бошида тўхтатганди. «Янгиланган» Malibu XL сотуви 2023 йил март ойидан бошланган. Ўшанда компания 3 хил комплектацияда сотувга чиқарилишини эълон қилган. Амалда эса фақат энг қиммат комплектацияни харид қилиш мумкин эди.

Жорий йил апрел ойида ижтимоий тармоқларда автовозга ортилган янги Malibu-2 автомобиллари видеоси тарқалгач, UzAuto Motors бу автомобиллар Хитойдан олиб келинаётганини билдирганди.

Ногиронлик пенсиялари проактив шаклда тайинланади

«Ногиронлик пенсиялари ва компенсацияларни тайинлашда проактив хизматларни жорий этиш тўғрисида»ги президент қарори қабул қилинди.

Қарорга мувофиқ, 2025 йил 1 июлдан фуқароларга давлат пенсиялари ва компенсацияларни тайинлашнинг соддалаштирилган тартиби жорий этилади.

Хусусан, фуқароларга I ёки II гуруҳ ногиронлиги белгиланганда пенсиялар алоҳида мурожаат талаб этмасдан проактив шаклда тайинланади. Бунда фуқарога проактив шаклда тайинланган пенсияларни рад қилиш ҳуқуқи берилади.

Шунингдек, кўриш қобилияти бўйича I гуруҳ ногиронлиги бўлган шахсларга ҳамда ядро полигонлари ва бошқа радиация-ядро объектларида ҳарбий хизматни ўтаган шахсларга компенсацияларни электрон маълумотлар алмашинуви асосида проактив шаклда тайинланади.

Ногиронлик пенсияси тайинлангандан сўнг камида 1 йил иш стажига эга бўлганда фуқаронинг пенсия миқдори ҳар 2 йилда проактив шаклда қайта ҳисобланади.

2025 йил 1 октябрдан давлат пенсия таъминотига оид ҳамда «Халқ банки» томонидан пенсияларни нақд пул шаклида тўлаш билан боғлиқ хизматлар фуқароларни биометрик идентификация қилиш, яъни Face-ID ҳамда уларнинг имзосини электрон шаклда олиш орқали амалга оширилади.

Қамчиқда Gentra хандаққа тушиб кетди

Тошкент–Ўш автомобил йўлининг Қамчиқ довонидан ўтган қисмида Водий–Тошкент йўналишида ҳаракатланган Gentra русумли автомобил ҳайдовчиси бошқарувни йўқотиб, йўлнинг хандақ қисмига тушиб кетди.

Фавқулодда вазиятлар вазирлигининг маълум қилишича, ушбу йўналишида ҳаракатланган яна бир «Мерседес» русумли автомобил ҳайдовчиси ҳам бошқарувни йўқотиб, йўл ўртасидаги темир тўсиққа урилган ва амалий ёрдам зарурлиги тўғрисида «Қамчиқ» махсус-қидирув ёнғин-қутқарув бошқармасига хабар келиб тушган.

Хабарга асосан, қутқарув отряди айтилган манзилларга етиб бориб, махсус техника ва асбоб-анжомлар ёрдамида хандаққа тушиб кетган автомобил чиқарилган ва иккинчи автомобил хавфсиз ҳудудга олиб ўтилган.

Gentra русумли автомобилда ҳайдовчи ва 4 нафар йўловчи бўлган. Иккинчи автомобилда ҳайдовчининг ўзи бўлган.

Ҳодиса оқибатида Gentra русумли автомобил ҳайдовчиси енгил тан жароҳати олган.