Қозоғистонда Каспий денгизи соҳилидан 100 дан ортиқ ўлик тюлен топилди

Қозоғистоннинг Манғистов вилояти Форт-Шевченко шаҳридан Каспий денгизи соҳилларига чиқариб ташланган 117 та тюлен жасади топилди. Бу ҳақда мамлакат Қишлоқ хўжалиги вазирлиги Балиқчилик қўмитаси хабар берди.

«Урал-Каспий балиқчилик хўжалиги инспекцияси рейд давомида 117 та тюлен жасадини аниқлади. Жасадларнинг чириганлик ҳолатидан келиб чиқиладиган бўлса, тюленлар ўтган йилнинг ноябр-декабр ойларида нобуд бўлган», — дейилади хабарда.

Қайд этилишича, тегишли органлар ходимлари денгиз қирғоғидан 5 километр узоқликда ётган тюленлар жасадини тўплаб, санитария нормаларига риоя қилган ҳолда уларни полигонда йўқ қилган.

Эслатиб ўтамиз, ўтган йилнинг ноябр охирларида Қозоғистоннинг Манғистов вилоятида сўнгги уч ҳафтада Каспий денгизи қирғоғидан мингдан ортиқ, жорий йилнинг май бошларида эса юзга яқин тюленнинг жасади топилганди.

Каспий тюлени Қозоғистон Қизил китобига киритилган. Олимларнинг ҳисоб-китобларига кўра, ҳозирги вақтда Каспий денгизининг Қозоғистон сектори акваториясида 240 мингдан ортиқ индивид яшайди. Бу ҳайвонларнинг оммавий қирилиши деярли ҳар йили кузатилади. Мутахассислар бунинг эҳтимолий сабаблари сифатида кемалар қатнови, денгизнинг ифлосланиши, микропластик ва балиқ овлаш тўрларини кўрсатмоқда. Тюленлар тўрларга ўралиб қолиб, жароҳатланади.