Жо Байден саратонга чалингани эълон қилинганидан кейин биринчи марта омма олдида кўриниш берди

АҚШ собиқ президенти Жо Байден простата бези саратонига чалингани эълон қилинганидан бери биринчи марта оммавий тадбирда иштирок этди, деб хабар беради NBC News.

Қайд этилишича, Байден 23 май куни набираси Роберт Ҳантер Байденнинг Солсбери шаҳрида бўлиб ўтган битирув кечасига ташриф буюрган. Тадбирда олинган суратни Байденнинг рафиқаси Жилл ва унинг қизи Эшли Instagram саҳифаларига жойлаган. «Табриклаймиз, Ҳантер — биз сен билан фахрланамиз», — деб ёзади Жилл Байден.

18 май куни Жо Байден вакиллари АҚШнинг собиқ президентига простата бези саратони ташхиси қўйилганини маълум қилди. Шифокорлар сўзларига кўра, касаллик Байденнинг аллақачон суякларига ўтиб кетган ва бу касалликнинг энг хавфли босқичи, уни даволаб бўлмайди. Шу билан бирга, онкология соҳасидаги етакчи мутахассислар замонавий тиббиёт бундай ташхис қўйилган беморларга яқинда бўлгани каби ойлар эмас, балки йиллар давомида яшашга имкон беришини таъкидлади.

Ушбу хабарлар тарқалгач, Байден ўзини ва оиласини қўллаб-қувватлаётганларга миннатдорчилик билдирди. «Саратон барчамизга таъсир қилади. Кўпчилигингиз каби Жилл ва мен ҳам қийин бўлган вазиятда энг кучли эканимизни билиб олдим. Бизга муҳаббат ва қўллаб-қувватлаш билан далда бераётганингиз учун ташаккур», деб ёзди Байден ижтимоий тармоқда.