Путин Донбассга бормоқчи. Уруш музокаралари фонида

Ўтган ҳафта дунё сиёсатчилари Украинадаги урушни тугатишга навбатдаги марта ҳаракат қилиб кўришди. Ва навбатдаги марта Трамп бошчилик «тинчликпарварлар» урушни тугатиш уларнинг эмас, бошқа бир одамнинг қўлида эканини англаб етишди. У одам эса урушни тугатмоқчи эмас. Қуйида мана шу одам атрофидаги охирги воқеаларга тўхталамиз.

{Yii::t(}

Ўтказиб юбориш 6s

Ўтказиб юбориш

«Путин ўзини ғолиб деб билади»

Американинг Wall Street Journal нашри ишончли манбаларига таяниб ёзишича, Путин билан телефон орқали мулоқот қилганидан кейин АҚШ президенти Трамп Россия президенти урушни тугатмоқчи эмаслигини тушуниб етган. Трамп бу ҳақда Европа лидерлари билан суҳбатда айтган.

Газетанинг ёзишича, Трамп европаликларга Путин аллақачон ўзини ғолиб деб ҳисоблаётгани, у урушни тугатиш ҳақида ўйламаётганини айтган. Европа лидерлари анча аввал англаб етган бу хулосани Трампдан илк марта эшитишди.

Bloomberg манбалари эса бошқачароқ маълумот берди. Унга кўра, Трамп Европа лидерларига «Путиннинг урушдаги ғалабасига ишонаётганини» айтган. Европаликлар Трамп ва Путин ўртасидаги бунақа ўзига хос келишувдан ҳайратга тушган.

Путин Донбассга боради

Кремл расмий вакили Дмитрий Песковнинг айтишича, Путин кейинроқ ўзини мустақил деб эълон қилган, уруш даврида Россия ўз таркибига қўшиб олган «Донецк ва Луҳанск халқ республикаларига» боради. Тўғри, Песков бу ҳақда Путиннинг Курскка ташрифидан кейин ўтказилган брифингда берилган саволга жавоб бериш асосида айтган, лекин уруш ҳолатидаги Россияда бунақа саволлар бежизга янграмайди.

Путин Донбассга бориши ҳақида шу кунларда гапирилиши ҳам бекорга эмас. Кремлда мана шунақа ишоралар билан гапиришни яхши кўришади ахир. Кремлдагилар бу ҳаракати билан гўёки сиз урушни тугатиш ҳақида гапираверинг, бизнинг «главнокомандуюший»имиз «янги ҳудудларимиз» Донбассга боради, дейишмоқчи. Россияда Украинанинг босиб олинган ҳудудларини айнан «янги ҳудудлар» деб аташади.

Путин Донбассга бориши янгилик эмас. Мариупол эгалланганидан кўп ўтмай у Донецкдаги бу шаҳарга бориб, одамлар билан учрашганди. Бироқ у Россия регионларига сафар қилгани каби Украинанинг босиб олинган ҳудудларига ҳозирча ишчи ташриф билан боргани йўқ.

Путин Курскка борди

Владимир Владимирович Донбассга бориши ҳақида гаплар бежизга тарқалмади. 20 май куни жаноб Путин Курскка борди. Бу гал ҳарбий кийимда оператив штабга бориш билан чекланмади, худди Россиянинг бошқа ҳудудларига бўлгани каби тўлиқ ишчи ташрифни амалга оширди. Курск АЭС-2 қурилиши билан танишди. Кейин област вақтинча губернатори Хинштейн билан учрашди. Хуллас, россияликларга Курскда ҳамма ёқ тинч, хавотир олманглар, деди. Донбассга ташрифдан мақсад ҳам шу бўлади.

Биз воқеалар ривожини, айниқса Владимир Владимировичнинг ҳар бир сафарини диққат билан кузатишда давом этамиз. Эътибор бериш керак бўлган бирор воқеа бўлса, албатта, сизни хабардор қиламиз. Энг муҳим хабарларни ўтказиб юбормаслик учун Kun.uz саҳифаларига обуна бўлинг.

Ўткир Жалолхонов тайёрлади.

Тасвирчи ва монтаж устаси – Фахриддин Ҳотамов.