Трамп Путин билан Зеленский учрашишини маълум қилди

АҚШ президенти Доналд Трампнинг россиялик ва украиналик ҳамкасблари Владимир Путин ва Володимир Зеленский билан учтомонлама учрашуви бўлиб ўтади. Трамп журналистлар билан суҳбатда бунга ишонч билдирди.

«Бу содир бўлади. Аммо бу учрашув уч ой олдин бўлиб ўтиши керак эди», деди АҚШ президенти.

Шу тариқа Трамп Путин ва Зеленский музокаралар столига ўтириши учун нима бўлиши керак, деган саволга жавоб берди.

Трамп Қўшма Штатлар Россияга қарши иккиламчи санкциялар киритишига тўғри келишини тан олди. «Эҳтимол», деди у, Вашингтон буни можарони ҳал қилишда олдинга силжишга эришиш учун 50 кунлик муҳлат тугашидан олдин амалга оширади.

Трамп бу ултиматумни 14 июл куни қўйганди. Унинг сўзларига кўра, агар Украинадаги можарони ҳал қилишда олдинга силжиш бўлмаса, АҚШ Москва ва унинг ҳамкорларига қарши 100 фоизлик иккиламчи божлар жорий қилади. Кремл Трампнинг сўзларини «жуда жиддий» деб атади ва уларни таҳлил қилишга ваъда берди.

Россия ва Украина президентлари учрашувини Киев ҳам талаб қилмоқда. Украина делегацияси раҳбари Рустем Умеров 23 июл куни Истанбулда бўлиб ўтган музокараларнинг учинчи раунди якунлари бўйича Киев Москвага август ойи охиригача олий даражадаги учрашувни ўтказишни ва унда Туркия ва АҚШ президентлари Ражаб Тоййиб Эрдўған ва Доналд Трамп иштирок этишини таклиф қилганини айтди.

Россия музокаралар гуруҳи раҳбари Владимир Мединскийнинг айтишича, бундай учрашув келишувни муҳокама қилиш учун эмас, балки «урушга нуқта қўйиш» учунгина ўтказилиши мумкин. Кремлда ҳам худди шундай фикр билдирилди. Бундай мураккаб жараён тезда якунланиши мумкин эмас, деди Россия президенти матбуот котиби Дмитрий Песков.