Путин Трампга 9 май куни Кремль яқинида терактларнинг олди олингани ҳақида гапирди

Россия президенти ёрдамчиси Юрий Ушаков «Ғалаба куни» байрами олдидан махсус хизматлар Кремль ва Қизил майдон ҳудудида «террорчилик ҳужумлари таҳдидининг олдини олганини» айтди. Бу ҳақда у «Интерфакс» билан суҳбатда маълум қилди.

Унга кўра, Владимир Путин АҚШ президенти Доналд Трамп билан телефон орқали суҳбатда Украина Россияга қарата юзлаб дрон ва «Storm Shadow» ракеталарини учиргани, уларнинг аксарияти уриб туширилганини айтган.

«Президентимиз яқинда нишонланган буюк Ғалаба юбилейи муҳимлигини таъкидлаб, Россия байрам арафасида уч кунлик сулҳ эълон қилганини, шундан сўнг 6 майдан 7 майга ўтар кечаси Украина Россия ҳудудига 524 та дрон учирганини, шунингдек, Американинг «Storm Shadow» ракеталарини учирганини эслатди. Уларнинг деярли барчаси Москвага йўлланди, бир вақтнинг ўзида пойтахт марказида ва Қизил майдонда терактлар таҳдиди олди олинди», деди Ушаков («Storm Shadow» аслида АҚШ эмас, балки Буюк Британия ва Франция томонидан ишлаб чиқарилади ва етказилади).

Ушаковнинг таъкидлашича, Путин «албатта, бу ҳақда Трампга тасодифан айтмаган, чунки украиналиклар байрам тадбирларидаги чет эллик иштирокчиларга тўғридан-тўғри таҳдид қилишган», шунингдек, «хорижий етакчиларни қўрқитишга ва уларнинг Москвага келишига тўсқинлик қилишга» уринган. Россия томони «бу қўрқитиш муаллифлари нацист жиноятчиларни ҳурмат қиладиган ва милитаристик қарашларни тарғиб қилувчилар бўлганини» таъкидламоқчи эди.

Путиннинг ёрдамчиси «икки президентнинг кечаги суҳбатида бу мавзу етарлича батафсил муҳокама қилинди ва буни алоҳида таъкидлаш жоиз», деди.

Унинг қўшимча қилишича, президентлар «Иккинчи жаҳон уруши даврида мамлакатларимиз иттифоқчи бўлиб, фашистлар Германияси ва милитаристик Японияга қарши биргаликда курашгани ҳақида узоқ ва илиқ сўзлашган».

6 ва 7 май кунлари Москва ва Россиянинг бошқа ҳудудларидаги аэропортлар Украина дронларининг ҳужумлари туфайли иш фаолиятини тўхтатди. 8 май куни тушдан кейин Росавиация Москва вилояти аэропортларида вазият барқарорлашгани ҳақида хабар берди.