АҚШда салкам 50 йил олдин содир этилган қотиллик тамаки қутисидаги бармоқ излари орқали фош қилинди

1977 йилда Оҳайода 24 ёшли қизнинг жасади топилган. Шу пайтга қадар қотилнинг кимлиги номаълумлигича қолиб келаётган эди. Янги текширувлар натижасда жиноятчининг шахси аниқланди.

Фото: Santa Clara County District Attorney's Office

АҚШнинг Оҳайо штатида яшовчи фуқарога ўнлаб йиллар олдин аёл кишини ўлдириш билан боғлиқ жиноят бўйича айблов эълон қилинди. Эркак камида 25 йил муддатга озодликдан маҳрум этилиши мумкин, деб ёзади NBC News.

Қайд этилишича, 1977 йилда 24 ёшли Жанетт Ралстон жинсий зўравонликка учраган, кейин эса бўғиб ўлдирилган. Унинг жасади бар яқинидаги автомобилнинг орқа ўриндиғидан топилган. Қизнинг дўстлари полицияга маълум қилишича, у бардан номаълум эркак билан бирга чиқиб кетган.

Санта-Клара округ прокурори ўринбосари Роб Бейкернинг сўзларига кўра, ҳуқуқ-тартибот ходимлари қурбоннинг машинасидан топилган тамаки қутисидаги бармоқ изларини Федерал тергов бюроси маълумотлар баъзаси орқали текшириб кўрган, аммо бундан натижа чиқмаган. Бюро қидирув тизимидаги алгоритмларини янгилаганидан кейин, ўтган йили бармоқ излари яна бир бор текширувдан ўтказилган.

Аниқланган бармоқ излари 69 ёшли Вилли Южин Симсга тегишли бўлиб чиққан. Унинг ДНКси ҳам Ралстоннинг бармоқ ости ва кўйлагидан топилган намуналарга мос келган.

Расмийларнинг сўзларига кўра, 8 май куни Симс суд қаршисида жавоб беради. У 25 йилдан умрбод қамоқ жазосигача ҳукм қилиниши мумкин.

#АҚШ #қотиллик #бармоқ изи