АҚШда қулликни бекор қилиш ҳақидаги ҳужжат 13,7 млн долларга сотилди

Қулликни тақиқловчи ҳужжат АҚШнинг 16-президенти Авраам Линколн томонидан имзоланган. Ушбу чора АҚШ Конституциясига киритилган 13-тузатиш сифатида мустаҳкамланган.

Фото: Sotheby’s

Америкалик миллиардер Кеннет С. Гриффин Sotheby’s аукционида АҚШда қулликни тақиқловчи ҳужжатни сотиб олди, деб ёзмоқда My Weekend.

Қайд этилишича, ҳужжатнинг қиймати комиссия тўловлари билан ҳисоблаганда 13,7 миллион долларни ташкил этган. Қулликни тақиқловчи ҳужжат АҚШнинг 16-президенти Авраам Линколн томонидан имзоланган. Ушбу чора АҚШ Конституциясига киритилган 13-тузатиш сифатида мустаҳкамланган.

Сенат 1864 йилда, Вакиллар палатаси 1865 йилда ушбу тузатишни қабул қилган. Бироқ баъзи штатлар, жумладан, Кентукки (1976) ва Миссисипи (1995) 20-асрда уни ратификация қилган.

Гриффин, шунингдек, 1864 йилда Линколн томонидан имзоланган Қулларни озод этиш тўғрисидаги прокламацияни 4,4 миллионга сотиб олган.

Ўз баёнотида миллиардер бу ҳужжатлар «инсонлар тенглиги ғоясини жамиятда мустаҳкамлаб, улкан тараққиёт босқичи бўлгани»ни таъкидлаган.

Кеннет С. Гриффин — Citadel хеж-фонди асосчиси, санъат соҳасидаги энг йирик коллекционер ва ҳомийлардан бири. У ARTnews Top 200 Collectors рўйхатига киритилган ва Жаспер Жонс, Виллем де Кунинг Жексон Поллок ва Пол Сезанн каби рассомларнинг асарларига эгалик қилади.

#АҚШ #Кеннет Гриффин