Хитой Трампнинг тарифларини Ҳиндистон ёрдамида четлаб ўтмоқчи

Хитойнинг баъзи компаниялари АҚШ президенти Доналд Трампнинг улкан тарифларини четлаб ўтишга имкон берадиган, аммо АҚШ бозорида қолиши мумкин бўлган бўшлиқни топди. Бунинг учун улар ҳинд экспортчиларига ўз номидан буюртмаларни бажариш учун мурожаат қилмоқда, деб хабар берди Bloomberg.

Ҳиндистон экспорт ташкилотлари федерацияси бош директори Ажай Саҳай сўзларига кўра, Гуанчжоудаги Кантон ярмаркасида хитойликлар бир нечта ҳинд фирмаларига мурожаат қилиб, ўз товарларини Америка бозорига етказишни таклиф қилган. Эвазига ҳинд фирмаларига комиссия таклиф этилган.

Агентликнинг эслатишича, АҚШга экспорт қилинадиган кўплаб Хитой товарларига 145 фоизлик бож жорий қилинган. Ҳиндистондан экспорт қилинадиган товарларга эса 10 фоиз солиқ солинади, бу Хитой компаниялари учун Ҳиндистон экспортчиларига мурожаат этишни анча фойдали қилади.

Аввалроқ, ўз маҳсулотларини АҚШ бозорига етказиб берадиган кўплаб хитойлик компаниялар Ветнамда заводлар очишга ёки ўз маҳсулотларини Таиландга жўнатишга қарор қилган, у ердан АҚШга экспорт қилишни режалаштирган эди. Кейинчалик Трамп Ветнамга 46 фоиз миқдорида жавоб божлари киритди, шу сабабли хитойлик экспортчилар Ҳиндистонга мурожаат қилишга мажбур бўлди.

Хитой компаниялари учун муаммо шундаки, Ҳиндистон ҳукумати Хитой сармоясига чекловларни сақлаб қолади. Бу компанияларга мамлакатда бизнес очиш ёки Ҳиндистон орқали АҚШга товарлар жўнатишини қийинлаштиради, деб тушунтиради агентлик.

Саҳаи журналистларга Хитой компаниялари сўровларининг кўпчилиги қўл асбоблари, электроника ва маиший техника каби соҳаларда эканлигини айтди.

Экспорт учун масъул ҳинд қўл асбоблари ишлаб чиқарувчиси OayKay Tools ходими Сиддҳант Аггарвал журналистларга ўз компанияси Америка ва Хитой фирмалари билан АҚШ бозорига товар етказиш бўйича музокаралар олиб бораётганини айтди.

Агентликнинг таъкидлашича, Хитой компаниялари учун бу бўшлиқ АҚШга маҳсулот экспорт қилишдан олган даромадларининг катта қисмини сақлаб қолиш имконини беради, Ҳиндистон эса АҚШда ўз иштирокини кенгайтириб, қўшимча даромад олиши мумкин.