Трамп Россия ва Украина ўртасида доимий сулҳ бўлишини истайди – Оқ уй

АҚШ президенти Доналд Трамп Россия ва Украина етакчиларидан ўт очишни доимий тўхтатиш тўғрисида келишиб олишини истамоқда ва «борган сари улардан кўнгли қоляпти».

Бу ҳақда Оқ уй матбуот котиби Кэролин Левитт Трампнинг 27 апрель куни Украина президенти Владимир Зеленский билан учрашуви ҳақида журналистларга маълумот бераётганда айтди.

«У [Трамп] ҳар икки давлат раҳбарларидан тобора кўпроқ кўнгли қолмоқда ва ўт очишни доимий тўхтатишни истамоқда. Менинг тушунишимча, Путин бугун эрталаб ўт очишни вақтинчалик тўхтатишни таклиф қилган. [АҚШ] президенти ўт очишни доимий равишда тўхтатишни - биринчи навбатда, қотилликлар ва қон тўкилишини тўхтатишни хоҳлашини аниқ айтди», деди Левитт.

Оқ уй матбуот котибининг қўшимча қилишича, Трамп келишувга эришиш имконияти ҳақида «оптимистик руҳда», бироқ айни пайтда «реалистик бўлиб қолмоқда: ҳар икки етакчи ҳам можародан чиқиш йўлини топиш учун музокаралар олиб бориши керак».

Кремль 28 апрель куни Россия Ғалабанинг 80 йиллиги муносабати билан «ҳуманитар сабабларга кўра» сулҳ эълон қилди. Ўт очишни тўхтатиш режими 8 май ярим тундан 11 май ярим тунгача амал қилади.