Марказий Осиё хавфсизлик кенгашлари раҳбарлари терроризмга қарши курашни муҳокама қилди

Ўзбекистон, Қозоғистон, Қирғизистон ва Тожикистон хавфсизлик кенгашлари котиблари, шунингдек, Туркманистоннинг Тошкентдаги элчихонаси ҳарбий атташеси Самарқандда бўлиб ўтган йиғилишда Марказий Осиёда терроризм ва экстремизмга қарши курашиш масалаларини муҳокама қилди.

Тадбир Ўзбекистоннинг раислиги доирасида Марказий Осиё давлатлари раҳбарларининг маслаҳат учрашувлари форматида бўлиб ўтди.

Ўзбекистон президенти Шавкат Мирзиёев форум иштирокчиларига табрик йўллади. Унда Марказий Осиё яхши қўшничилик, ўзаро ишонч ва конструктив мулоқот тамойилларига асосланган стратегик шериклик минтақасига айланиб бораётгани алоҳида таъкидланди.

Ўзбекистон Марказий Осиё давлатлари раҳбарларининг Маслаҳат учрашувига раислигида глобал хавфсизликни мустаҳкамлаш, савдо-иқтисодий алоқаларни чуқурлаштириш, транспорт алоқаларини мустаҳкамлаш, шунингдек, мамлакатлар олдида турган долзарб масалаларнинг барқарор ечимларини биргаликда излашга қаратилган минтақавий шериклик кун тартибини илгари суради, дейилади хабарда.

Иштирокчилар минтақавий хавфсизлик, терроризм, экстремизм, радикаллашув ва трансмиллий уюшган жиноятчиликка қарши курашиш, минтақада экологик хавфсизликни таъминлаш соҳасидаги ҳамкорлик, шунингдек, Марказий Осиёда транспорт хавфсизлигини таъминлаш ҳамда транспорт-транзит салоҳиятини ривожлантириш масалаларини муҳокама қилди.